Ադրբեջանական Turan լրատվական գործակալության փոխանցմամբ՝ ԱՄՆ Կոնգրեսի իրավական հանձնաժողովի համանախագահներ Թոմ Լանթոսն ու Ջեյմս Մաքգովերնը նամակ են հղել Ադրբեջանի նախագահ Իլհամ Ալիևին, որում նրան կոչ են արել բանտերից ազատ արձակել ադրբեջանցի քաղբանտարկյալներին։
Նամակում նրանք մտահոգություն են հայտնում Ադրբեջանում քաղբանտարկյալների հարցի չլուծման կապակցությամբ. «Մենք գնահատում ենք տնտեսական ու սոցիալական կայունությանն ուղղված Ադրբեջանի ջանքերը։ Սակայն մտահոգված ենք, որ Ադրբեջանը չի կարողանում ապահովել մարդու իրավունքների պաշտպանությունը և առաջին հերթին լուծել քաղբանտարկյալների հարցը։ Ադրբեջանի կառավարությունը պետք է պահպանի իր միջազգային պարտավորությունները»։
Հիշեցնենք, որ ներկայումս ադբեջանական իշխանությունները չեն ընդունում երկրում քաղբանտարկյալների առկայությունը, ինչի պատճառով էլ տևական ժամանակ հրաժարվում են մուտքի արտոնագիր տրամադրել ԵԽԽՎ-ի քաղբանտարկյալների գծով զեկուցող Քրիստոֆեր Շտրասերին։
Այս կապակցությամբ Human Rights Watch միջազգային իրավապաշտպան կազմակերպության՝ Եվրոպայի ու Կենտրոնական Ասիայի գծով բաժնի պետի տեղակալ Ռեյչել Դենբերն օրեր առաջ հայտարարել էր. «Եթե Ադրբեջանում ամեն ինչ լավ է, և թաքցնելու ոչինչ չկա, այդ դեպքում ինչո՞ւ են ադրբեջանական իշխանությունները խոչընդոտում Շտրասերի ժամանմանը։ Ադրբեջանը մարդու իրավունքների պաշտպանության համար պայքարի պատրանք է ստեղծում։ Միջազգային հանրությունն ադրբեջանական իշխանություններից ակնկալում է իրական փոփոխություններ»։
