Թուրքական t24.com կայքի փոխանցմամբ՝ մոտ 300 թուրք լրագրողներ երեկ երեկոյան՝ ժամը 19.30-ին, բողոքի ակցիա են կազմակերպել Ստամբուլի «Թաքսիմ» հրապարակում։
Պատճառն այն է, որ նույն օրը Թուրքիայում «Քրդական համայնքների միության» (KCK) գործի շրջանակներում ձերբակալվել է 38 լրագրող, որոնց մեղադրում են քուրդ զինյալների հետ առնչություն ունենալու մեջ։ Ձերբակալված լրագրողների թվում են հայտնվել քրդական «Դիջլե» և «Ֆըրաթ» լրատվական գործակալությունների, ինչպես նաև «Վաթան» թերթի ներկայացուցիչները։
Ցուցարարները վանկարկել են «Ազատ մամուլը չի կարող լուռ մնալ», «Վե՛րջ դրեք լրագրողների նկատմամբ կիրառվող տեռորին» և այլն։ Նրանք ընդգծել են, որ եթե իրենք հիմա լռեն, ապա ապագայում իրենց կսպասվի նույն ճակատագիրը։
Թուրք լրագրողները հայտարարել են, որ Թուրքիայի բանտերում գտնվում են ավելի քան 70 լրագրողներ։
Հիշեցնենք, որ այս տարվա նոյեմբերի վերջին քրդական «Ֆըրաթ» լրատվական գործակալությունը հայտնեց, որ վերջին 7 ամիսներին KCK-ի գործի շրջանակներում ձերբակալվել է 4547 մարդ, որոնցից 1838-ը կալանավորվել է։
