Կառավարությունն ասում էր, թե մեր 100 հազար հայրենակիցները գնացել էին արտագնա աշխատանքի, բայց եթե այդ 100 հազարը գնացել են արտագնա աշխատանքի, ապա պետք է Նոր տարվա դեմ անպայման վերադառնային, և արդյունքում պետք է առևտուրը ծաղկեր: Ազգային վիճակագրական ծառայության տվյալներով, այս տարվա նոյեմբերին, հոկտեմբերի համեմատ, առևտրի շրջանառությունն ավելացել է ընդամենը 2.1%-ով:
«Առաջին լրատվական»-ի հետ զրույցում ԱԺ ֆինանսավարկային և բյուջետային մշտական հանձնաժողովի անդամ, «Ժառանգություն» խմբակցության պատգամավոր Արմեն Մարտիրոսյանը նշեց, որ դրա մեջ նաև գնաճը պետք է հաշվել, և կպարզվի, որ առևտրի ֆիզիկական ծավալները ոչ թե ավելացել, այլ նվազել են:
«Այսինքն՝ միանշանակ 2 միտում կա՝ հայրենակիցների մեծ մասը, ցավոք, իսկապես արտագաղթել է, ոչ թե արտագնա աշխատանքի է մեկնել, և եթե գնաճն ենք հաշվի առնում՝ ֆիզիկական աճ գոյություն չունի»,- փաստեց Ա. Մարտիրոսյանը՝ հավելելով, որ այդ նվազումը բացառապես պայմանավորված է նրանով, որ գյուղատնտեսական սեզոնն ավարտվել է, և մեզ մոտ որևէ այլ կայուն աճ ապահովող ոլորտ գոյություն չունի: Մենք տնտեսական խորը խնդիրների առջև ենք կանգնած
Հարցին, թե տնտեսության ներկայիս միտումների արդյունքում հնարավոր կլինի՞ պայքարել աղքատության դեմ, Ա. Մարտիրոսյանը պատասխանեց. «Եթե իշխանությունն անընդհատ չպայքարի աղքատության նվազման դեմ, այլ հանգիստ թողնի այդ դաշտը, հնարավոր է մի օր տեսնենք, որ խնդիրը լուծվում է: Որքան իշխանությունը ինչ-որ բանի համար պայքարում է, միշտ դրա հակառակ արդյունքն ենք տեսնում:
Աղքատության դեմ պայքարում են՝ այն դարձել է պաշտոնական 35%, ոչ պաշտոնական՝ 60%, կարծում եմ՝ շատ ավելի շատ, երբ հաշվի ենք առնում, թե որն է միջին աշխատավարձը, որն է նվազագույն աշխատավարձը և որն է կենսապահովման նվազագույն զամբյուղը:
Պայքարում են արդար, օրինական ընտրությունների համար, բայց ամեն մի ընտրություն նախորդից ավելի վատն է լինում:
Պայքարում են մոնոպոլիաների դեմ՝ քանի գնում տնտեսության կենտրոնացվածությունը մեծանում է:
Պայքարում են եկամուտների բևեռացվածության դեմ՝այնքան սրվում է»,- ասաց Ա. Մարտիրոսյանն ու հավելեց. «Այն, ինչ խոսում են՝ գեղեցիկ խոսքեր են: Նախագահի և վարչապետի վերջին խոսքերը գեղեցիկ ճառեր են, բայց որքան գեղեցիկ է ճառը, այնքան շատ ավելի հեռու է իրականությունից, և այդ անդունդն ավելի է խորանում»:
