Արվեստի գործերի թագավորական հավաքածուից Լեոնարդո դա Վինչիի տասը նկարներ 2012 թվականին ցուցադրվելու են Մեծ Բրիտանիայի տարբեր քաղաքներում:
Ինչպես հայտնում է BBC News-ը, Դա Վինչիի «շրջագայությունն» սկսվելու է Բիրմինհեմից, այնուհետև ուղևորվելու է Բրիստոլ և այլ քաղաքներ:
Լեոնարդոյի ստեղծագործություններն ընտրվել են 600 նկարներից, որոնք պահվում են Վինձորյան պալատում: Ենթադրվում է, որ տասը աշխատանքները պատմելու են իտալացի վարպետի հետաքրքրությունների, մասնավորապես նրա գիտական հետազոտությունների մասին:
Հազվադեպ ցուցադրվող նկարները ցուցադրվելու են Էլիզաբեթ Երկրորդ թագուհու «ադամանդե» հոբելյանի պատվին: 2012 թվականի փետրվարի 6-ին լրանալու է թագուհու գահակալման 60-ամյակը:
Լեոնարդո դա Վինչիի նկարները հայտնաբերվել են 1519 թվականին Ֆրանսիայի իր արհեստանոցում, նկարչի մահից հետո: Բրիտանացի թագավորների հավաքածուում դրանք տեղ են գտել 17-րդ դարում՝ Կառլ Երկրոդ թագավորի օրոք: Թագավորական հավաքածուում հաշվվում է մոտ 7 հազար յուղաներկ կտավ, 40 հազար ջրանկար, հին վարպետների մոտ 150 հազար փորագրություններ:
Հավաքածուում են կան նաև գրքեր, կահույքի մասեր, կերամիկա և արվեստի այլ գործեր: