Հյուսիսային Կորեայում խիստ միջոցառումներ են ձեռնարկվել Կիմ Չեն Իրի մահվան կապակցությամբ: Իշխանություններն արգելել են բնակիչներին դուրս գալ տներից: Այս մասին հաղորդում է հարավկորեական Daily NK ինտերնետ պորտալը:
Պորտալի տվյալներով, հյուսիսկորեական քաղաքների փողոցները հսկում են զինվորականները և անվտանգության ուժերի աշխատակիցները: Այդ միջոցառումներն ուղղված են հնարավոր ժողովրդական շարժումները վերահսկելուն, սակայն այս պահին հուզումների նշույլ չկա:
Բացի այդ, Հյուսիսային Կորեայի իշխանություններն ուժեղացրել են վերահսկողությունը Չինաստանի սահմանին: «Սահմանի երկայնքով յուրաքանչյուր 4 մետրի վրա զինվորներ են կանգնած»,- հայտնել է պարբերականի աղբյուրը:
Ավելի վաղ չինական ԶԼՄ-ները հաղորդում էին, որ Հյուսիսային Կորեայում փակվել են բոլոր խանութները, իջեցվել են դրոշները, մարդիկ հավաքվում են փողոցներում՝ առաջնորդի մահը սգալու:
Հիշեցնենք, որ Հյուսիսային Կորեայի առաջնորդ Կիմ Չեն Իրը մահացել է դեկտեմբերի 17-ի առավոտյան՝ գնացքի մեջ:
