Իրանական Mehr News լրատվական գործակալության փոխանցմամբ, Իրանում բնակչության աճի տեմպն ընկել է։ Իրանի Վիճակագրական կենտրոնի ղեկավար Ադիլ Ազերը հայտարարել է, որ եթե 2006 թվականին Իրանում բնակչության աճը կազմել է 1.6 տոկոս, ապա այս տարի այն նվազել է մինչև 1.3 տոկոս։
Ազերը հայտնել է, որ Իրանի բնակչության թվաքանակը կազմել է 74,961,702 մարդ, որի 51 տոկոսը՝ տղամարդիկ, իսկ 49 տոկոսը՝ կանայք։ Իրանի բնակչության 71 տոկոսը բնակվում է քաղաքներում, մինչդեռ 2006 թվականին այդ ցուցանիշը կազմում էր 68 տոկոս։
Իրանում առկա է 20,703,935 ընտանիք, որոնցից յուրաքանչյուրը միջին հաշվարկով բաղկացած է 3.6 անձից։ Նշվում է, որ Իրանում մարդահամարներն անցկացվում են 5 տարին մեկ, դրանցից վերջինն անցկացվել է հոկտեմբերի 24-ից նոյեմբերի 13-ն ընկած ժամանակահատվածում։
