Դեկտեմբերի 19-ին Հայաստանի ԱԳ նախարար Էդվարդ Նալբանդյանը, պաշտպանության նախարար Սեյրան Օհանյանը և ԱԱԽ քարտուղար Արթուր Բաղդասարյանը մասնակցել են Հավաքական անվտանգության պայմանագրի կազմակերպության արտգործնախարարների խորհրդի, պաշտպանության նախարարների խորհրդի և անվտանգության խորհուրդների քարտուղարների կոմիտեի համատեղ նիստին:
ՀՀ ԱԳՆ մամլո գրասենյակից «Առաջին լրատվական»-ին տեղեկացնում են, որ նիստի ընթացքում քննարկվել և հավանության են արժանացել դեկտեմբերի 20-ին կայանալիք Հավաքական անվտանգության խորհրդի նիստի օրակարգն ու քննարկվելիք հարցերը, որոնք միտված են կազմակերպության և դրա շրջանակներում համագործակցության առավել ամրապնդմանը:
Նախարարներն անդրադարձել են 2010 թ. դեկտեմբերին կայացած Հավաքական անվտանգության խորհրդի ընդունված որոշումների և ս.թ. օգոստոսի 12-ին Աստանայում տեղի ունեցած ՀԱՊԿ անդամ պետությունների ղեկավարների ոչ պաշտոնական հանդիպմանը ձեռք բերված պայմանավորվածությունների իրականացման ընթացքին:
Համատեղ նիստին քննարկվել է Հավաքական անվտանգության պայմանագրի ստորագրման 20-ամյակի և Հավաքական անվտանգության պայմանագրի կազմակերպության ստեղծման 10-ամյակի կապակցությամբ անդամ-պետությունների ղեկավարների կողմից ընդունվելիք հայտարարությունը:
Հանդիպման օրակարգում էին նաև հավաքական անվտանգության համակարգի կատարելագործման, ռազմական, ռազմատնտեսական և ռազմատեխնիկական համագործակցության օպտիմալացման, ահաբեկչության և թմրադեղերի ապօրինի շրջանառության դեմ պայքարի, արտակարգ իրավիճակների արձագանքման հարցերը:
ՀԱՊԿ անդամ երկրների արտաքին գործերի և պաշտպանության նախարարների, անվտանգության խորհուրդների քարտուղարները քննարկել են կազմակերպության գլխավոր քարտուղարի տարեկան զեկույցը, տեղեկատվական բնագավառում համագործակցության, կազմակերպչական և ֆինանսական հարցեր, ինչպես նաև համաձայնեցրել են ՀԱՊԿ կանոնադրական մարմինների հաջորդ նիստերի վայրն ու ժամկետները:
Համատեղ նիստի արդյունքում ստորագրվել են շուրջ երկու տասնյակ փաստաթղթեր, որոնք ներկայացվել են Հավաքական անվտանգության խորհրդի հաստատմանը:
Նիստի ավարտին ՀԱՊԿ-ի արտգործնախարարների խորհրդի, պաշտպանության նախարարների խորհրդի և ազգային անվտանգության խորհուրդների քարտուղարների կոմիտեի նախագահությունը Բելառուսից փոխանցվել է Ղազախստանին:
Նույն օրը կայացել են ՀԱՊԿ արտգործնախարարների խորհրդի, պաշտպանության նախարարների խորհրդի և անվտանգության խորհուրդների քարտուղարների կոմիտեի առանձին նիստերը:
