Պակիստանյան Լահոր քաղաքում դեկտեմբերի 18-ին անցկացվել են հակաամերիկյան զանգվածային ցույցեր:
Ինչպես հայտնում է France-Presse գործակալությունը, տեղի ոստիկանության տվյալներով՝ ցույցին մասնակցել է 70 հազար մարդ, սակայն գործակալության աշխատակցի տվյալներով՝ մոտ 40 հազար մարդ:
Ցուցարարները, որոնց մեծամասնությունը իսլամիստական կուսակցությունների ներկայացուցիչներ և կողմնակիցներ էին, երկրի կառավարությունից պահանջել են վերանայել ԱՄՆ-ի հետ կնքած ահաբեկչության դեմ պայքարի վերաբերյալ համաձայնագրերը և Վաշինգտոնին թույլ չտալ միջամտել Պակիստանի գործերին:
Ցուցարարները նաև հայտարարել էին, որ պատրաստ են, իր նշան բողոքի, քայլել մինչև երկրի մայրաքաղաք, որը գտնվում է Լահորից 250 կմ հեռավորության վրա:
ԱՄՆ-ի և Պակիստանի միջև հարաբերությունները վատացել էին այն բանից հետո, երբ նոյեմբերի 26-ին ամերիկյան անօդաչուները հարձակվել էին պակիստանյան ռազմական հենակետի վրա, որի արդյունքում մահացել է 24 զինծառայող:
Պակիստանի իշխանությունները շատ խիստ են պատասխանել միջադեպին` օդային հարվածն անվանելով ագրեսիա:
Ամերիկյան զորահրամանատարությունը ներողություն է խնդրել Պակիստանից, ինչպես նաև հայտարարել է, որ անցկացնելու է միջադեպի հետաքննություն:
