Անցնող տարին քաղաքական առումով բավական հետաքրքրական տարի էր` մանավանդ ներքաղաքական զարգացումների առումով: Տարեվերջյան ամփոփիչ ասուլիսում այս մասին հայտարարեց քաղաքագետ Ալեքսանդր Իսկանդարյանը:
Նա կարևորեց հատկապես 2011 թվականին իշխանության և Հայ ազգային կոնգրեսի միջև ծավալված երկխոսությունը: «Հաջորդ կարևոր գործընթացը ինչպես իշխանության, այնպես էլ ընդդիմության ներսում առկա մոնոլիտության և մրցակցության հանգամանքն է: Այս ամենն ուղղված է և կապ ունի առաջիկա ընտրությունների հետ: Իրականում քաղաքական տարին կավարտվի միայն մայիսին կայանալիք խորհրդարանական ընտրություններից հետո:
Ինչ վերաբերում է հայ քաղաքականության մեջ մեծ տեղ գրավող ղարաբաղյան հարցին, ապա կարծում եմ, որ այս տարի այդ հարցում փոփոխություններ սպասել չարժեր, և այդպես էլ եղավ: Ուղղակի Ադրբեջանի կողմից ռազմաշունչ հայտարարությունները քչացան, նրա հռետորաբանությունը փոքր-ինչ փոխվեց: Ադրբեջանցի պաշտոնատար անձանց կողմից շփման գծում պատ կառուցելու հայտարարությունները չգիտեմ` որքանով իրականություն կդառնան, սակայն ակնհայտ է, որ ղարաբաղյան հակամարտությունը շուտ չի լուծվի. այդպես մտածում են ինչպես Երևանում և Բաքվում, այնպես էլ Մոսկվայում, Վաշինգտոնում և Փարիզում»,- նկատեց քաղաքագետը:
Անդրադառնալով Ֆրանսիայի Սենատում քննարկված` Հայոց ցեղասպանության հերքման համար քրեական պատասխանատվության ենթարկելու մասին օրինագծին, Իսկանդարյանը նկատեց, որ դրա ընդունման դեպքում Թուրքիայի արձագանքը նյարդային կլինի:
«Ինչ վերաբերում է հայ-թուրքական հարաբերությունների կարգավորման գործընթացին, ապա այն կարող է լուծել միայն թուրքական ղեկավարությունը, իսկ թուրք ղեկավարության համար այս պահի համար դա ամենակարևոր հարցը չէ:»