Facebook-ում բացվել է «Ռալֆ Յիրիկյան – ՀՀ նախագահ» անունով էջը, որն արդեն ունի 300-ից ավելի անդամներ: Էջում տեղադրված լուսանկարներն ու նյութերը բավական լավ մտածված ու մշակված են, ինչը հաստատում է փորձագետների այն կարծիքը, որ էջը ինքնաբուխ նախաձեռնություն չէ:
Հիշեցնենք, որ 2011թ. նոյեմբերի 30-ին ռուսական Cnews-ը տարածել էր հետևյալ տեղեկություն այն մասին, որ ռուսական «MTC-ը ֆինանսավորում է Հայաստանի պոտենցիալ նախագահ Ռալֆ Յիրիկյանին»: Ապա մանրամասնում. «Мобильные телесистемы» (МТС) ընկերությունը 90 մլն դոլարի չափով վարկ է տրամադրել լիբանանցի ձեռնարկատերեր Պիեռ և Մուսա Ֆատուշներին, որոնք МТС-ին պատկանող հայկական բջջային օպերատոր «Ղ-Տելեկոմի» (առևտրական ապրանքանիշը` Vivacell – MTS) համասեփականատերերն են: Շուկայի մասնակիցները չեն բացառում, որ վարկը կարող է պետք գալ Ֆատուշների նկատմամբ բարեկամաբար տրամադրված «Ղ-Տելեկոմի» գլխավոր տնօրեն Ռալֆ Յիրիկյանի քաղաքական ձգտումներն իրականացնելու համար, որին դիտում են որպես ՀՀ առաջիկա նախագահական ընտրությունների հնարավոր թեկնածու:
Ինչպես հաղորդում է Cnews-ը` MTS-ը մինչև 2016թ. երկարացրել է Ֆատուշների ընտանիքից «Ղ-Տելեկոմի» ակցիաների 20%-ը գնելու վերաբերյալ 2 օպցիոն համաձայնագրերը: 2007թ. МТС-ը Ֆատուշներից 260 մլն եվրոյով ձեռք էր բերել International Cell Holding օֆշորի ակցիաների 80%-ը՝ 3 տարիների ընթացքում վճարելով միայն 50 մլն եվրո: Այդ ժամանակ կողմերը call- և put- օպցիոն համաձայնագրեր էին կնքել մնացած 20% ակցիաների վերաբերյալ: Դրանցից առաջինը МТС-ին հնարավորություն էր ընձեռում գնել այդ փաթեթը, մյուսը Ֆատուշներին իրավունք է տալիս վաճառել МТС-ի ակցիաները: Երկու օպցիոնային համաձայնագրերի նախնական ժամկետը լրացել է 2012թ.:
Նոր պայմանավորվածության համաձայն` call օպցիոնի իրականացման դեպքում МТС-ը կարող է մնացած գումարը գրանցել Ֆատուշների պարտքի դիմաց: Իսկ put-օպցիոնը Ֆատուշները կարող են իրականացնել միայն վարկի վճարումից հետո: Գործարքին մոտ կանգնած աղբյուրները վկայում են, որ այդպիսով МТС-ն օգնել է բիզնեսի իր գործընկերներին և միաժամանակ առաջ տարել իր սեփական շահը:
«Ղ-Տելեկոմի» մրցակից աղբյուրներից մեկը МТС-ից գումարներ ստանալու Ֆատուշների ցանկությունը համարում է քաղաքական քայլ, որն ուղղված է նրա գլխավոր տնօրեն Ռալֆ Յիրիկյանի քաղաքական ամբիցիաները բավարարելուն: Ինքը՝ Յիրիկյանը, ծնվել է Լիբանանի հայկական ընտանիքում , 2001թ. եղել է Լեռնային Ղարաբաղում և գլխավորել Ֆատուշների հիմնադրած «Ղ-Տելեկոմ» ընկերությունը:
2004թ. Հայաստանի իշխանությունները «ԱրմենՏել» ընկերությանը զրկեցին բջջային կապի բացառիկ արտոնագրից՝ այն տալով «Ղ-Տելեկոմին»: Դրանից հետո լուրեր տարածվեցին, որ այն ժամանակ Հայաստանի նախագահ Ռոբերտ Քոչարյանը և տրանսպորտի ու կապի նախարար Անդրանիկ Մանուկյանն իրենց հետաքրքրություններն ունեն ընկերությունում:
Այժմ ԱՊՀ երկրներում «Ղ-Տելեկոմը» МТС-ի միակ «դուստրն» է, և ռուսական ընկերությունը ակտիվների ձեռքբերումից հետո չի փոխել մենեջմենթը:
Cnews-ի զրուցակիցը նշել է, որ այս ընկերությունը առավել, քան МТС խմբի մյուս օպերատորները, շատ է ծախսում բարեգործության վրա, ընդ որում` այդ գումարները հավաքվել են Լիբանանում հայկական համայնքի կողմից:
Բացի այդ, «Ղ-Տելեկոմը» ակտիվորեն իր գործունեությունը գովազդում է ԶԼՄ-ներում, ինչը առիթ է այն դարձել լուրերի տարածմանը, թե Յիրիկյանը պատրաստվում է իր թեկնածությունն առաջադրել Հայաստանի առաջիկա նախագահական ընտրություններին:
МТС-ը հրաժարվել է որևէ մեկնաբանությունից` կապված Յիրիկյանի քաղաքական ամբիցիաների և «Ղ-Տետլեկոմի» ծախսերի հետ:
Այս տեղեկության տարածումից հետո «ՎիվաՍել-ՄՏՍ» ընկերության մամուլի ծառայության տարածած հաղորդագրությունը հերքել էր այս լուրը պնդելով, թե Յիրիկյանը նախագահ դառնալու հավակնություններ չունի:
