Կրկնվող են դարձել սպիտակ տնակներն ու սպիտակ տոնածառերը, բայց ես չեմ ցանկանում մեղադրել այն մարդկանց, ովքեր նույնատիպ են զարդարում, քանի որ ամեն ինչ, ի վերջո, բախվում է ֆինանսներին: Այս մասին լրագրողների հետ հանդիպմանը, անդրադառնալով քաղաքի ամանորյա ձևավորումներին, ասաց Նորաձևության հայկական խորհրդի անդամ, դիզայներ Լիլիթ Մարգարյանը:
«Սովորական մահկանացուները` փոքր ու միջին բիզնեսի, խանութների տերերն իրենց չեն կարող թույլ տալ մեծ ֆինանսներ` իրենց խանութների դիմաց, փողոցը շքեղ ձևավորելու համար»,- ասաց Լ. Մարգարյանը` ցանկություն հայտնելով, որ քաղաքի փողոցներում լինեին Ամանորը հիշեցնող կերպարներ, մարդիկ, երաժշտություն: «Մենք հիմա ավելի շատ դրա կարիքը ունենք` երաժշտություն, ոգևորության, ոգեշնչման աղբյուրի կարիք ունենք: Նույնատիպ Ձմեռ պապիները՝ մաշված հագուստներով, մեզ մի քիչ բարկացնում են»,- ասաց նա` նշելով, որ ցանկալի կլիներ, որ այդ հագուստները նորովի կարվեին ու ձևավորվեին:
Նրա խոսքով, Հայաստանի ամանորյա զարդարանքները համեմատել տնտեսապես զարգացած երկրների ամանորյա զարդարանքների հետ, տեղին չէ, սակայն «կարելի էր ցանկանալ է՛լ ավելին»:
Ըստ նրա՝ Ամանորի նախաշեմին ավելի շատ են հոգսերը, քան ուրախությունները, ու կոչ արեց պայքարել այն երևույթի դեմ, որ Ամանորը սկսել է ոչ թե ուրախություն, այլ հոգս պատճառել մարդկանց: Դրա վառ ապացույցը, նրա համոզմամբ, այն է, որ հիմա կանայք ավելի քիչ են ուշադրություն դարձնում Ամանորի գիշերը նոր զգեստ կրելուն, մինչդեռ վիճակը մի քանի տարի առաջ այլ էր:
«Կանայք հնարավորություն չունեն շատ ուշադրություն դարձնել իրենց անձին, քանզի ամբողջ ընտանեկան բյուջեն տրամադրում են սեղանի խորտիկներին, գուցե տան կահավորմանը»,- ընդգծեց դիզայները` հայ կանանց խորհուրդ տալով փոքր-ինչ ուշադիր լինել, սիրել սեփական անձը:
Նրա խոսքով, հայ կինն աշխարհի ամենագեղեցիկ, նորաձև, ամենախնամված կինն է, քանի որ հայ կինն անգամ այս պայմաններում կարողանում է հետևել իրեն, լինել ներկած մազերով, հարդարված մազերով ու կոկիկ: «Հայ կինն աշխարհի ամենանորաձև կինն է, իսկ ինչ վերաբերում է բարձր ճաշակին, ապա Աստված ոչ բոլորին է տալիս հնարավորություն, որ կարողանան արժանի կերպով օգտագործել այդ միջոցները»,- ասաց նա` ընդգծելով, որ այսօր հայ կինը հագնում է այն հագուստները, որը պարտադրում են մեր շուկան ու խանութները, որոնց մեծամասնությունն առաջարկում է հին սեզոնի հագուստներ:
Նա առաջարկեց միայն հետևել նորաձևությանը` սխալներից խուսափելու համար:
