Ղազախական Время թերթը հաղորդում է, որ օպերատոր Բաուրժան Իդրիսովը լրագրողների հետ եղել է Ժանաոզեն քաղաքի հրապարակում, երբ այնտեղ սկսվել են բախումները:
«Այս հրապարակում նավթագործները նստած էին. այստեղ տեղի է ունենում գործադուլ: Դա նրանց սովորական գործն է: Մեկ էլ սկսեցին տեղադրել տոնածառներ, ինչը նավթագործների դուրը չեկավ: Ամբոխը նետվեց դրանք վերացնելու: Ջղայնացած մարդիկ վազեցին դեպի բեմը, որը տեղակայված էր հրապարակում, և սկսեցին ջարդել տոնախմբության համար նախատեսված սարքավորումները: Ոստիկանները փախան: Սկզբում նախազգուշական կրակոցներ եղան: Հետո հատուկ նշանակության ջոկատի աշխատակիցները եկան, սկսվեց կրակոց և նռնակներ էին օգտագործվում»,-պատմել է ականատեսը:
Ըստ նրա՝ հրապարակում վիրավորներ են եղել: «Ես նկարահանել եմ, թե ինչպես են մարդկանց այդտեղից դուրս բերել: Չգիտեմ ողջ են նրանք, թե պարզապես գիտակցությունն են կորցրել, բայց մեկ բանում վստահ եմ՝ նրանք վիրավոր են: Կան վիրավորներ և՛ ոստիկանների շարքերում, և՛ նավթագործների, և՛ երիտասարդության»,-պատմել է Իդրիսովը:
Նրա հաղորդմամբ՝ քաղաքում շենքեր կան, որոնք այրվել են և շատ վնասվել: Նա նաև նշել է, որ քաղաքում շուտով զրահապատ տեխնիկա կհայտնվի:
«Մարդիկ քայլում են քաղաքի փողոցներով: Նրանց են միանում ոչ միայն նավթագործները, այլ նաև քաղաքի բնակիչները: Կապ համարյա չկա: Դժվարությամբ է հաջողվում որևէ տեղ զանգել»,- ասել է նա:
