Rosbalt.ru-ի փոխանցմամբ, Պենտագոնում ամերիկյան CNN հեռուստաալիքի ունեցած աղբյուրները հայտնել են, որ դեկտեմբերի 4-ին Իրանի արևելքում ընկած ամերիկյան RQ-170 Sentinel անօդաչու թռչող սարքը (ԱԹՍ) գործածվել է իրանական միջուկային օբյեկտներին հետևելու համար։
Ավելի վաղ ԱՄՆ-ի ու ՆԱՏՕ-ի ներկայացուցիչները հայտնում էին, որ այդ ԱԹՍ-ն գործածվել է իրանա-աֆղանական սահմանին պարեկության համար, սակայն շեղվել է իր բնականոն ուղուց։
CNN-ի աղբյուրը հայտնում է, որ Աֆղանստանի ղեկավարությունը ոչինչ չի իմացել, որ ամերիկացի մասնագետներն իրենց տարածքից ԱԹՍ-ներ են գործուղում Իրան՝ նրա ռազմավարական օբյեկտների դիտարկման համար։
Աղբյուրը հավելել է, որ ԱԹՍ-ն պատկանել է Կենտրոնական հետախուզական վարչությանը (ԿՀՎ), որը պատասխանատու է եղել ինֆորմացիայի հավաքման համար։ Սակայն ԿՀՎ-ն Պաշտպանության նախարարությանը չի իրազեկել Իրանում ընկած ԱԹՍ-ի առջև դրված առաջադրանքների մասին։
Դրա համար էլ, ըստ աղբյուրի, Իրանում ամերիկյան ԱԹՍ-ի կորուստի մասին լուրը շփոթմունք է առաջացրել ամերիկացի այն զինվորականների շրջանում, ովքեր ոչինչ չեն իմացել ԿՀՎ-ի նախագծի մասին։
