«Առաջիկա ընտրությունների հիմնական դերակատարներն են ՀԱԿ-ը, «Ժառանգություն»-ը, ԲՀԿ-ն և ՀՀԿ-ն»: Այս մասին այսօր լրագրողների հետ հանդիպմանը ասաց ՀՔԴՄ նախագահ Խոսրով Հարությունյանը: Վերջինս անդրադառնալով ՀՀԿ-ին և այդ կուսակցության հետ համագործակցությանը` նշեց, որ իրենք տևական ժամանակ է (սկսած 2008 թվականի նախագահական ընտրությունների նախընտրական փուլից)` համագործակցում են միմյանց հետ:
«Մեր կուսակցությունը մշտապես սատարել է ՀՀԿ-ին և մշտապես եղել է ՀՀ նախագահի կողքին` թե արտաքին և թե ներքին քաղաքականության հարցերում»:
Ինչպես հայտնեց Խ. Հարությունյանը` առաջիկա ընտրություններին նույնպես կսատարեն ՀՀԿ-ին, և դժվար թե մի քանի ամսվա ընթացքում փոխվեն իրենց քաղաքական հայացքները:
Անդրադառնալով Ռուսաստանում տեղի ունեցող իրադարձություններին` Խոսրով Հարությունյանը նշեց. «Անընդունելի է զուգահեռներ անցկացնել Հայաստանի և Ռուսաստանի քաղաքական իրավիճակների միջև: Դրանք ինքնուրույն քաղաքական պրոցեսներ են և պետք է վերլուծվեն միմյանցից անկախ»:
Նրա կարծիքով` 2012-ին հավանաբար դարձյալ չեն անցկացվի արդար և թափանցիկ ընտրություններ. «Ընտրակեղծիքներ, այնուամենայնիվ, կլինեն»:
