2011թ. դեկտեմբերի 14-ին ՀՀ անկախության 20-ամյա հոբելյանի շրջանակում ֆրանսահայ համայնքի ներկայացուցիչներին և հայկական կազմակերպություններին շնորհված գերատեսչական պարգևների հանձնման նպատակով Փարիզի կենտրոնում գտնվող «Պավիլիոն Դոֆին» հանդիսությունների սրահում տեղի է ունեցել բազմամարդ հավաք:
Այն անցկացվել է «Հազարամյա Հայաստանը 20 տարեկան է» խորհրդանշական խորագրի ներքո:
ՀՀ ԱԳՆ մամլո գրասենյակից «Առաջին լրատվական»-ին տեղեկացնում են, որ միջոցառմանը ներկա էին ֆրանսահայ նշանավոր անհատականություններ, ֆրանսահայ եղեկեցական և համայնքային կառույցների ղեկավար ու շարքային անդամներ, մտավորականներ, մշակույթի, արվեստի և կրթության ոլորտների գործիչներ, գիտնականներ, քաղաքագետներ, տնտեսագետներ, ուսանողներ, լրագրողներ, ֆրանսահայության ավելի քան 500 ներկայացուցիչներ:
Պաշտոնական ընդունելության շրջանակներում տեղի է ունեցել հասարակական-քաղաքական, գիտա-մշակութային ամենատարբեր ոլորտներում աչքի ընկած, Հայաստան-Ֆրանսիա, Հայաստան-սփյուռք կապերի ամրապնդման գործին իրենց նպաստը բերած ֆրանսահայ անհատներին և կազմակերպություններին ՀՀ մշակույթի, սփյուռքի և կրթության ու գիտության նախարարությունների կողմից շնորհված ՀՀ գերատեսչական պարգևների ու շնորհակալագրերի հանձնման հանդիսավոր արարողություն:
Գերատեսչական բարձրագույն մեդալներով պարգևատրվածների թվում էին Ֆրանսիայում հանրաճանաչ անհատականություններ Ժանսեմը, Ալեն Թերզյանը, Էլեն Սեգարան, Պատրիկ Ֆիորին, Անդրե Մանուկյանը, Սերժ Ավետիքյանը, Ժաքի Ներսեսյանը, Ռոբեր Գեդիկյանը, Սիմոն Աբգարյանը, Ժեռալդ Փափազյանը, եկեղեցական գործիչներից` վերապատվելի Սամուել Սահակյանը, Միսաք Մանուշյանի խմբի վերջին ներկայացուցիչ Արսեն Չաքարյանը, Ֆրանսահայ նախկին ռազմիկների միության նախագահ Անտուան Բաղդիկյանը, նախկին ռազմիկներ Աշոտ Շմավոնյանը և Ժան Չագուչյանը, կրթության գործի կազմակերպիչներ Գեղամ Ղեւոնյանն ու Անահիտ Դոնաբեդյանը:
Նրանց թվում էին նշանավոր հայագետներ, հայապահպանման խնդիրներով զբաղվող հասարակական գործիչներ, տնտեսագետներ, ճարտարապետներ, բարերարներ, հեղինակավոր կազմակերպություններից` Սոցիալական օգնության հայկական ասոցիացիան, Ֆրանսիայի տարբեր քաղաքներում ու շրջաններում գործող երկու տասնյակ մշակութային միություններ, հայկական դպրոցներ ու վարժարաններ, երգի և պարի համույթներ:
Ամփոփիչ խոսքով հանդես է եկել Ֆրանսիայում ՀՀ դեսպան Վիգեն Չիտեչյանը, ով շնորհակալություն է հայտնել հայ համայնքի անհատ ներկայացուցիչներին և կառույցներին` ՀՀ 20-ամյա հոբելյանական տարվա շրջանակներում վեց տասնյակից ավելի միջոցառումների անցկացման կապակցությամբ:
