ԱՄՆ Կոնգրեսը մի քանի ամիս տևած վեճերից հետո հաստատել է 2012 թ. Պենտագոնի բյուջեն 662 մլրդ դոլարի չափով: Ինչպես հաղորդում է Associated Press-ը, Սենատը բյուջեն հաստատել է 86 «կողմ» և 13 «դեմ» ձայներով:
Օրինագծում ներառված են զինծառայողներին պահելու, սպառազինության համակարգի, Իրաքում և Աֆղանստանում ռազմական գործողությունների, ազգային անվտանգության ապահովման ծախսերը:
Բյուջեի չափը 27 մլրդ դոլարով քիչ է, քան նախատեսում էր Օբամայի վարչակազմը, սակայն նախագահը խոստացել է մոտ ժամանակներս ստորագրել օրինագիծը:
Կոնգրեսում հատկապես մեծ վեճեր են առաջացրել օրինագծի երկու փոփոխությունները: Դրանցից մեկը կասկածելի էր թվում՝ կապված ահաբեկչության և «Ալ-Քաիդայի» հետ: Կոնգրեսն Օբամայի և ազգային անվտանգության հարցերով նրա խորհրդականի ճնշման տակ համաձայնել է ընդունել փոփոխությունը, որը թույլ է տալիս այդպիսի հարցերը քննել ոչ միայն ռազմական, այլև քաղաքացիական դատարանով:
Երկրորդ փոփոխությունը վերաբերում է ԱՄՆ իշխանություններին ահաբեկչության մեջ մեղադրվող ամերիկացիներին և օտարերկրացիներին անորոշ ժամանակով բանտերում պահելու լիազորություններով օժտելուն: Սակայն Կոնգրեսը որոշել է, որ այդպիսի հարցերը մտնում են ԱՄՆ Գերագույն դատարանի լիազորությունների մեջ:
