Ինչպես հաղորդում է PCmag.com կայքը, մոտ ժամանակներում Yahoo! ընկերությունը կփակի մի քանի ծառայություն, որոնց թվում է AltaVista որոնողական համակարգը:
Այն ծրագրերի շարքում, որոնք Yahoo!-ի ղեկավարությունը նպատակահարմար է գտել փակել, բացի AltaVista-ից մտնում են նաև ցանցային հավելվածների փոխանակման «Delicious» (del.icio.us) համակարգը, տեղեկատվական Yahoo! Buzz-ը, նկարների փոխանակման Yahoo! Picks համակարգը և MyBlogLog սոցիալական ցանցը:
TechCrunch տեխնոբլոգը կարծում է, որ FireEagle, Yahoo! Events և Yahoo! People Search նույնպես փակման եզրին են:
Yahoo! –ից այս տեղեկատվության վերաբերյալ պաշտոնական հաստատում դեռ չի ստացվել: Բացի այդ, գործադիր փոխտնօրեն և հոլդինգի ապրանքատեսակների գծով գլխավոր տնօրեն Բլեյք Իրվինգը Twitter-ում իր զարմանքն է արտահայտել հնչեցված նմանատիպ կարծիքի մասին:
AltaVista-ն, որը թողարկվել էր 1995թ.-ին, համարվում էր 90-ականների ամենահզոր որոնողական համակարգերից մեկը` մինչև Google-ի հայտնվելը: Սկզբնական շրջանում կայքի անվանումն էր altavista.digital.com, ապա այն ստացավ ավելի կարճ անվանում` av.com:
1999թ.-ին ռուսական «Սպլին» ռոք խումբը թողարկեց «Ալտավիստա» անունով ալբոմ, որի հենց առաջին երգը նվիրված էր որոնողական այս համակարգին: