Ադրբեջանում Գաբալայի ռադիոլոկացիոն կայանը Ռուսաստանի համար ներկայումս անհամեմատ պակաս կարևոր դերակատարություն ունի, քան Հայաստանում տեղակայված ռուսական ռազամաբազան: «Առաջին լրատվական»-ի հետ զրույցում նման տեսակետ հայտնեց ռազմական փորձագետ Արծրուն Հովհաննիսյանը:
«Միաժամանակ համեմատությունը փոքր-ինչ տեղին չէ: Այլ խնդիր է, որ ոմանց կարծիքով, Հայաստանը ռուսական ռազմաբազա պահելու պայմանների վերանայման կարիք ունի: Միգուցե: Դա բարձրագույն ղեկավարության որոշելիք խնդիրն է, կամ եթե հասարակությունն այդ առնչությամբ ասելիք ունի, ապա ինչ-որ կերպ կարտահայտի իր դիրքորոշումը: Այս պահին Հայաստանում սեփական ռազմաբազա ունենալու համար Ռուսաստանից վարձավճար պահանջելն այնքան էլ հնարավոր չեմ համարում, միգուցե ավելի ուշ դա հնարավոր լինի: Շատ կարճ ժամանակ է անցել Հայաստանում տեղակայված ռուսական ռազմաբազայի ժամկետների երկարաձգման պայմանագրի կնքումից: Եթե վարձավճարի հարցը վերանայման կարիք ուներ, գուցե հենց այդ ժամանակ էլ այդ հարցը դրվեր, եթե ոչ՝ միգուցե այդ հարցն առավել արդիական կլինի ասենք 5 տարի հետո»,- նկատեց փորձագետը:
Ռազմական փորձագետը նշեց նաև, որ այն խնդիրը, որ կատարում է Գաբալայի ռադիոլոկացիոն կայանը, բոլորովին անհամեմատելի է նրա հետ, ինչ անում են Հայաստանում տեղակայված ռուսական զորքերը: «Գաբալան, իրադրությունից բխելով, կարող է առավել կարևոր դառնալ, քան հայաստանյան ռազմաբազան, բայց հնարավոր է նաև, որ տասնյակ տարիներով կայանը Ռուսաստանի համար կարևորություն չներկայացնի, մանավանդ, որ Գաբալան ներկայումս կիսաակտիվ ռեժիմով է աշխատում»,- ամփոփեց Արծրուն Հովհաննիսյանը:
Հիշեցնենք, որ երկարաձգման մասին պայմանավորվածությունը նախկինում ձեռք էր բերվել երկու երկրների պաշտպանական գերատեսչությունների ղեկավարների միջև, սակայն հարցի ֆինանսական կողմը բաց էր մնացել: Նախարարների պայմանավորվածության համաձայն՝ նոր պայմանագիրը պետք է հաստատված լինի արդեն հաջորդ տարվա փետրվար-մարտ ամիսներին: Հատկանշական է, որ ռուսական կողմն առաջարկում է պահպանել ներկայում գործող՝ 7 մլն դոլարի վարձավճարը, միևնույն ժամանակ նվազեցնելով վարձվող տարածքի չափը: Սակայն Ադրբեջանը նոր պայմաններ է ներկայացրել ռուսական կողմին:
