Փոքրիկների սիրելի Ամանորին հաշված օրեր են մնացել: «Առաջին լրատվական»-ը փորձեց պարզել` ինչպես են մանկատներում դիմավորում Նոր տարին:
Մեզ հետ զրույցում «Զատիկ» մանկատան փոխտնօրեն Անահիտ Ամիրյանը տեղեկացրեց, որ մանկատանը հատուկ միջոցառումներ նախատեսված չեն, սակայն Ձմեռ պապն ու Ձյունանուշն, անշուշտ, հյուր կգան երեխաներին: «Ձմեռ պապն էլ է գալիս, Ջյունանուշն էլ, արջն էլ»,- կատակով ասաց նա:
Նրա խոսքով, կան կազմակերպություններ, որոնք ամեն տարի այցելում են մանկատուն ու փորձում տոն պարգևել երեխաներին: Նրանց թվում են ամերիկյան «Քաջ Նազար» կազմակերպության հայաստանյան գրասենյակը, տիկնիկային թատրոնը, դպրոցներից ու համալսարաններից գալիս են աշակերտներ, ուսանողներ:
Այս պահի դրությամբ հստակ որոշված է, որ դեկտեմբերի 24-ին ՀՕՖ-ը մանկատան երեխաներին կտանի Պարոնյանի անվան երաժշտական կոմեդիայի թատրոն` դիտելու Հովհաննես Թումանյանի հեքիաթների հիման վրա բեմադրված ներկայացումը, իսկ դեկտեմբերի 27-ին երեխաների համար ամանորյա միջոցառում կկազմակերպի ոստիկանության Երևանի քաղաքային վարչությունը:
Ա. Ամիրյանի խոսքով, ամանորյա տոնական հրավերների թիվն ավանդաբար ավելանում է դեկտեմբերի 20-ից հետո:
«Զատիկ» մանկատանը ներկայում ապրում են 15-18 տարեկան 30 երեխա, փոքր երեխաներ չկան:
