Միջազգային շուկայում դոլարի թանակցմանը զուգահեռ Հայաստանում դոլարը նվազման միտումներ է ցույց տալիս: «Առաջին լրատվական»-ի հետ զրույցում տնտեսագետ Արամ Կայֆաջյանը կարծիք հայտնեց, որ Հայաստանում դոլար-դրամ փոխարժեքի ձևավորման գործում միջազգային փոխարժեքը դեր չի խաղում: Մեր երկրում դոլար-դրամ փոխարժեքը ձևավորվում է շուկայի պահանջարկ-առաջարկի արդյունքում, մնացած փոխարժեքներն էլ ձևավորվում են դրա հիման վրա:
«Հայաստանում ավելի շատ պահանջարկի դեպքում դոլարի գինը բարձրանում է: Դա պայմանավորված է արտահանմամբ, ներմուծմամբ, դրանց քանակով, նաև գազի համար վճարվող գումարների և այդ պահին եկող տրանսֆերտների գործոններով, քանի որ տրանսֆերտները փոխարկվում են դրամի»,- ասաց Ա. Կայֆաջյանը:
Նրա խոսքով, ոսկու գինն անմիջական կապ ունի միջազգային շուկայում գնի հետ, որովհետև հիմնականում ներմուծվում է: Նա նշեց, որ ոսկու գինը 4 ամիս առաջվա համեմատ շատ է բարձրացել, բայց վերջին 1 ամսում նվազել է, և այդ անկումը շարունակվում է:
