Առաջիկա տարիներին արտաքին պետական պարտքի սպասարկման հետ կապված` Հայաստանը, հնարավոր է, խնդիրներ կունենա: Նման մտավախություն «Առաջին լրատվական»-ի հետ զրույցում հայտնեց «Ժառանգություն» խմբակցության պատգամավոր, ԱԺ ֆինանսավարկային և բյուջետային հարցերի մշտական հանձնաժողովի անդամ Արմեն Մարտիրոսյանը:
Պատգամավորը նկատեց, որ վերջերս «Մուդիս» վարկանշային կազմակերպության կողմից ՀՀ–ի համար կանխատեսման իջեցումը փաստարկված էր, և փորձագետներն իրենց վերլուծությունում նշել էին այն աղբյուրները, որտեղից գոյանում են ՀՀ–ի եկամուտները ու, թե որքանով են դրանք վտանգի տակ։ Նրանք, հաշվի առնելով արտաքին պարտքի մեծությունը, նաև նշել էին, որ հնարավոր է իսկապես խնդիրներ ունենաք: Իրավիճակն առավել ևս կսրվի, եթե նորից ճգնաժամ լինի, մենք նորից ստիպված լինենք ինտենսիվ վարկային միջոցներ ներգրավել, ինչը կարող է վտանգավոր լինել վերադարձվելիության տեսակետից:
«Ծայրահեղ շատ վատ վիճակ կստեղծվի, որովհետև, ըստ էության, լինելու ենք պետություն, որը դեֆոլտի առաջ է կանգնելու, իսկ հինը մարելու համար նոր պարտք վերցնելու մեխանիզմը հնարավոր է չաշխատի»,- ասաց Ա. Մարտիրոսյանը՝ հավելելով, որ եթե այն, ինչ փորձագետները սպասում են, իրականանա և հարվածը շատ մեծ լինի Հայաստանի համար, այդ ժամանկահատվածը մոտակա 1-2 տարին է լինելու:
