Ամանորյա տոներին հաշված օրեր են մնացել: Ավանդույթի համաձայն՝ հայ ընտանիքները Նոր տարին դիմավորելու են իրենց տանը: Ոմանք արդեն որոշել են այս տարի Ամանորի գիշերն անցկացնել արտերկրում` արևադարձային երկրում: Նրանց, ում ֆինանսական միջոցները չեն բավարարում արտասահման մեկնելու համար կամ պարզապես ցանկանում են Նոր տարին այլ կերպ տոնել, Հայաստանի ռեստորանային համալիրներն այլընտրանք են առաջարկում:
«Առաջին լրատվական»-ը փորձեց պարզել, թե ինչքան գումար կպահանջվի այն քաղաքացիներից, ովքեր որոշել են տոնական գիշերը նշել ռեստորանում: Ինչպես մեզ տեղեկացրին «Փարվանա» ռեստորանից, մեկ անձի համար սահմանված է 30 հազար դրամ առաջին հարկում և բեմի դիմաց, երկրորդ հարկում` 25 հազար դրամ: Գումարի մեջ ներառված է սնունդը, շոու ծրագիրը: Մատուցվելու է երկու տեսակի տաք ուտեստ`խորոված, ձուկ կամ տապակած ճուտ՝ ֆրիով: Սեղանին կլինի նաև երկու տեսակի աղցան, կարմիր ձկնկիթ, պանրի տեսականի, ալկոհոլային և զովացուցիչ ըմպելիքներ: Շոու ծրագրի ընթացքում կլինեն երգ, պար, կենցաղային իրերի խաղարկություն, անակնկալ երգիչների մասնակցություն:
«Բելաջիո» ռեստորանային և հյուրանոցային համալիրն ամանորյա ծրագիրն առաջարկում է մեկ անձի համար 45 հազար դրամով: Գումարի մեջ ներառված է ուտելիքը և շոու ծրագիրը: Սեղանին կլինի երկու տաք ուտեստ, քաղցրավենիք, խմիչքի տեսականի: Շոու ծրագիրը վարելու է հաղորդավարը, երաժշտական մասն ապահովելու են երգիչ-երգչուհիները և «Բելաջիո» համույթը:
Կան ռեստորաններ, որտեղ այցելուները պետք է վճարեն մուտքի գումար:
«Արքայաձոր» ռեստորանում Ամանորյա շոուի մուտքի տոմսն արժե 10 հազար դրամ, իսկ ճաշացանկը լինելու է ինչպես ամեն օր: Այցելուները կվճարեն այնքան, ինչքան կպատվիրեն: Այստեղ նույնպես լինելու է շոու ծրագիր, խաղարկություններ:
«Կակտուս» ռեստորանում մուտքի տոմսն արժե 15 հազար դրամ, որին ավելանում է նաև 10 հազար դրամ կանխավճարը: Այն նախատեսված է ուտելիքի համար: «Կակտուս» ռեստորանից տեղեկացրին, որ լինելու են խաղեր, կապահովվի հետաքրքիր ժամանց:
«Հարսնաքար» ռեստորանային համալիրում նույնպես կա մուտքի տոմս, որն արժե 10 հազար դրամ: Լինելու են երգիչների կատարումներ, իսկ այցելուները կվճարեն այնքան, ինչքան ուտելիք կպատվիրեն:
Հիշեցնենք, որ ռեստորաններում Ամանորի գիշերն անցկացնելն անցյալ տարվա համեմատ ավելի մատչելի է: Անցյալ տարի գները սկսվում էին 30 հազար դրամից:
