Ռուսական Regnum լրատվական գործակալության փոխանցմամբ, Ադրբեջանի իշխող «Ենի Ազերբայջան» կուսակցությունը (ԵԱԿ) քննադատել է ԱՄՆ-ին՝ Ադրբեջանում մարդու իրավունքների շուրջ առկա իրավիճակը «սխալ գնահատելու» համար։
ԵԱԿ-ի գործադիր փոխքարտուղար, Միլի մեջլիսի պատգամավոր Մուբարիզ Գուրբանլըն այսօր տեղի ունեցած ճեպազրույցի ժամանակ հայտարարել է. «ԱՄՆ պետքարտուղար Հիլարի Քլինթոնը Մարդու իրավունքների միջազգային օրվա կապակցությամբ իր ուղերձում բացասաբար է արտահայտվել Ադրբեջանի մասին, ինչը «հեռու է» իրականությունից։
Ամերիկյան իշխանությունների ու միջազգային կառույցների այդօրինակ հայտարարությունների հետևում ոչ թե մարդու իրավունքների պաշտպանությունն է, այլ՝ կատարելապես այլ նպատակներ։ Ադրբեջանը վավերացրել է 1948 թվականի Մարդու իրավունքների դեկլարացիան, մինչդեռ ԱՄՆ-ը պաշտոնապես այն դեռ չի վավերացրել։
Եթե ԱՄՆ-ը դա ընդուներ, ապա այսօր նրա քաղաքացիները չէին պայքարի իրենց սոցիալական իրավունքների համար, ակցիա չէին անցկացնի Նյու Յորքում, ուր նրանց դեմ նետել են հեծյալ ոստիկանությանը, և մեկ օրում չէր ձերբակալվի 600 մարդ»։
Հիշեցնենք, որ սրանից առաջ էլ Քլինթոնին քննադատել էր Ադրբեջանի նախագահի աշխատակազմի արտաքին կապերի բաժնի պետ Նովրուզ Մամեդովը՝ նրան մեղադրելով «երկակի ստանդարտներ կիրառելու և հայասիրության մեջ»։
ԱՄՆ պետքարտուղար Հիլարի Քլինթոնը Մարդու իրավունքների միջազգային օրվա կապակցությամբ դեկտեմբերի 9-ի իր ելույթում խոսել է տվյալ ոլորտում առկա խախտումների մասին և բացասական օրինակների թվում շոշափել է Ադրբեջանի ու Զիմբաբվեի անունները։
