Թուրքական Anadolu գործակալության փոխանցմամբ՝ Թուրքիայի տնտեսության նախարար Զաֆեր Չաղլայանը հայտարարել է, որ այս տարի Թուրքիան արտահանման ոլորտում ռեկորդային ցուցանիշ է գրանցել։
Չաղլայանի խոսքերով՝ այս տարի թուրքական արտահանումը կազմել է 134 միլիարդ դոլար։
Հիշեցնենք, որ այս տարվա հունիսի 12-ին տեղի ունեցած Թուրքիայի խորհրդարանական ընտրությունների նախաշեմին Թուրքիայի վարչապետ Էրդողանի գլխավորած «Արդարություն և զարգացում» կուսակցությունը (ԱԶԿ) թողարկել էր երկու գրքույկ, որոնցից մեկում նշված էր ԱԶԿ-ի իշխանության 8.5 տարիներին Թուրքիայի ունեցած ձեռքբերումների մասին, իսկ մյուսում՝ մինչև 2023 թվականը (Թուրքիայի Հանրապետության հիմնադրման 100-ամյակ) Թուրքիայի ունենալիք ձեռքբերումների մասին։
Ըստ դրանց՝ թուրքական արտահանումը 2023 թվականին կազմելու է 500 միլիարդ դոլար։ Մինչ այդ՝ 2015 թվականին, թուրքական արտահանումը հասցվելու է 201 միլիարդ դոլարի, իսկ 2019 թվականին՝ 317 միլիարդ դոլարի։
Ուշագրավ է, որ երբ 2002 թվականին ԱԶԿ-ն եկավ իշխանության, թուրքական արտահանումը կազմել էր ընդամենը 36 միլիարդ դոլար։
