ՀՀ ԱԳՆ մամլո գրասենյակից «Առաջին լրատվական»-ին տեղեկացնում են, որ դեկտեմբերի 13-ին ԱԳ նախարար Էդվարդ Նալբանդյանը, ով Հռոմում է աշխատանքային այցով Իտալիա ժամանած ՀՀ նախագահին ուղեկցող պատվիրակության կազմում, հանդիպել է Իտալիայի ԱԳ նախարար Ջուլիո Տերցիի հետ:
«Ես ուրախ եմ հանդիպել Ձեզ Հռոմում և անձամբ շնորհավորել արտգործնախարարի պաշտոնում նշանակվելու կապակցությամբ: Վստահ եմ, որ համատեղ ջանքերով մենք կկարողանանք առավել խորացնել մեր երկու երկրների միջև փոխշահավետ համագործակցությունը», – ասել է Է. Նալբանդյանը:
Զրույցի ընթացքում երկուստեք նշվել է, որ հայ-իտալական հարաբերություններն ունեն հազարամյակների պատմություն, որը հիշարժան է բարի ավանդույթներով և փոխադարձ բարեկամության դրսևորումներով, և այդ ամենը ամուր հիմք է ստեղծում հարաբերությունների առավել ամրապնդման և խորացման համար:
Հայաստանի և Իտալիայի արտգործնախարարներն անդրադարձել են հայ-իտալական քաղաքական, առևտրատնտեսական և մշակութային հարաբերությունների զարգացման, իրավապայմանագրային դաշտի ընդլայնմանն առնչվող հարցերի:
Մշակութային փոխանակումների տեսանկյունից նախարար Նալբանդյանը կարևորել է Հռոմում «Դվին. Հայաստանի մայրաքաղաքը Եվրոպայի և Ասիայի միջև» և Վենետիկում «Հայաստան. Քաղաքակրթության դրոշմներ» ցուցահանդեսների անցկացումը և շնորհակալություն հայտնել Իտալիայի կառավարության աջակցությամբ Հայաստանում մշակութային արժեքների վերականգնողական կենտրոնի հիմնադրման համար:
Բանակցությունների ընթացքում քննարկվեցին Հայաստան – Եվրամիություն համագործակցության տարբեր ուղղությունները, Եվրոպական հարևանության քաղաքականության և Արևելյան գործընկերություն ծրագրի շրջանակներում իրականացվող նախագծերը:
Հայաստանի և Իտալիայի արտաքին քաղաքական գերատեսչությունների ղեկավարներն անդրադարձան միջազգային և տարածաշրջանային խնդիրների: Այս համատեքստում արտգործնախարար Նալբանդյանը ներկայացրել է ԼՂ հիմնախնդրի խաղաղ կարգավորման գործընթացի վերջին զարգացումները:
