ՀՀ փոխվարչապետ, տարածքային կառավարման նախարար Արմեն Գևորգյանի մոտ դեկտեմբերի 12-ին կայացած խորհրդակցության ընթացքում քննարկվել են Արմավիրի և Արագածոտնի մի շարք համայնքներում գազիֆիկացման աշխատանքների իրականացումն ստանձնած ընկերությունների գործունեությանն առնչվող հարցեր:
Տարածքային կառավարման նախարարության հասարակայնության հետ կապերի բաժնից «Առաջին լրատվական»-ին հայտնում են, որ խորհրդակցությանը մասնակցել են ֆինանսների նախարարը, Արմավիրի և Արագածոտնի մարզպետները, ԱԺ «Ժառանգություն» խմբակցության պատգամավոր Ա. Բախշյանը, գյուղատնտեսության նախարարության, «Գյուղական տարածքների տնտեսական զարգացման ԾԻԳ»-ի, իրավապահ մարմինների ներկայացուցիչներ, համայնքների ղեկավարներ:
Խորհրդակցության ընթացքում նշվել է, որ Արմավիրի և Արագածոտնի մարզերի մի շարք համայնքներում 2004-2007թթ. գազիֆիկացման աշխատանքների իրականացումն ստանձնած «Մանշին», «Ման-Նախ» և «Տեդաս» ընկերությունների աշխատանքներում արձանագրվել են թերություններ և խախտումներ:
Իրավապահ մարմինների կողմից ձեռնարկվել են համապատասխան միջոցառումներ` պատճառված վնասը վերականգնելու ուղղությամբ:
Գլխավոր դատախազության ներկայացուցիչները տեղեկացրել են, որ «Մանշին» և «Ման –Նախ» ընկերությունների թույլ տրված խախտումների առնչությամբ հարուցված քրեական գործերով դատաքննությունն ավարտվել է, կայացվել են վնասը վերականգնելու վերաբերյալ դատական վճիռներ:
Վերոնշյալ ընկերություններից ներկայումս միայն «Մանշինն» ունի 10 մլն դրամի պարտավորություն, որը մինչև դեկտեմբերի 15-ը մարելու ժամանակացույց է կնքել համայնքապետերի հետ: Պարտքը չմարելու դեպքում գումարը գանձվելու է դատական կարգով:
«Տեդաս» ընկերության տնօրենի դեմ հարուցված քրեական գործը գտնվում է դատաքննության փուլում, և դատարանը որոշելու է ընկերության կողմից վերջնական պարտավորությունների չափը:
Ընկերությունը գնահատված վնասի չափով գումար է փոխանցել Ոստիկանության դեպոզիտային հաշվին, և մեղադրանքն ապացուցվելու պարագայում գումարը գանձվելու է:
Խորհրդակցության ավարտին փոխվարչապետն արձանագրել է, որ նկատված չարաշահումների բոլոր դեպքերով վնասը վերականգնելու ուղղությամբ քայլեր ձեռնարկվել են, դրանց հիմնական մասը վերականգնվել է, մյուս մասի վերականգնման գործընթացը շարունակվում է:
Արձանագրվել է սակայն, որ նշված համայնքներում (Արագածոտնի երկու և Արմավիրի յոթ համայնքներում) գազիֆիկացման աշխատանքներն ավարտելու համար կպահանջվի լրացուցիչ 600 մլն դրամ:
Փոխվարչապետը նկատել է, որ վերջին տարիներին գազիֆիկացումն իրականացվում է «Գյուղական տարածքների տնտեսական զարգացման ԾԻԳ»-ի աջակցությամբ, և լրացուցիչ միջոցներ ներգրավելու պարագայում դրանք առաջնահերթ կուղղվեն այն համայնքներին, որտեղ աշխատանքներն անավարտ են մնացել:
