Հեռուստահաղորդավարուհի Նազենի Հովհաննիսյանն այսօր «Ազդակ» ակումբում «Զարուհի» ամսագրի կողմից ստացավ «Տարվա լավագույն հաղորդավարուհի» մրցանակ, որից հետո տեղի ունեցած ասուլիսի ընթացքում խոսեց ընտանիքում կնոջ դերի մասին, իր ապագա անելիքների, ձեռքբերումների մասին, իսկ անցնող տարին համարեց բարենպաստ, քանի որ հասցրել է մշակել երկու մեծ նախագիծ, որոնց մասին շուտով կտեղեկանանք, նորից խաղալ Կամերային թատրոնում և նկարահանվել մի քանի ֆիլմերում:
Ըստ նրա` պետք չէ, որ կինն իր կյանքը զոհի հանուն երեխաների և ամուսնու: Ընտանիքի յուրաքանչյուր անդամ պետք է ապրի իր գաղափարով` հանուն ընտանիքի բարեկեցության: Դերասանուհին նշեց, որ այժմ իրեն հուզում է երեք հարց, որոնցից հատկապես առանձնացրեց Թեղուտի խնդիրը: Մանկության հուշ է մնացել, որ Թեղուտը մաքուր էր, իսկ հիմա այնտեղ փոշի է: Երբ քամի էր լինում, լսվում էր ծառերի սոսափը, հիմա դա չկա, սակայն դերասանուհին ասաց, որ այն փոշին, որ ինքն է շնչում, իր համար թանկ է, և չի ուզենա ապրել այլ երկրում:
Վերջին նկարահանումներից առանձնացրեց «Ալաբալանիցա» ֆիլմը, որտեղ նկարահանվելու առաջարկությունը ստացել է Հայկո-Մկոյի կողմից: Ֆիլմում նա բացասական դեր է կատարում, սակայն կարողացել է նաև բարեհաջող կատարել և այս դերը: Դերասանուհին խոսեց նաև արտերկրում նկարահանվելու մասին: Նա նշեց, որ արտասահմանյան ֆիլմերում նկարահանվելու հրավեր չի ստացել: Արտասահմանյան ֆիլմերում նկարահանվելը, ըստ նրա, հեշտ չէ, դրա համար կարևոր նախապայման է այնտեղ ապրելը:
