«Ժառանգություն» խմբակցությունը առաջարկով դիմել էր ՀՀ կառավարությանը` Մարտի 1-ի զոհերի հարազատներին եկող տարվա բյուջեից 500 միլիոն դրամի փոխհատուցում հատկացնելու վերաբերյալ` հիմնավորելով, որ 2008 թվականի մարտիմեկյան դեպքերի ժամանակ նրանք դարձել են պետական մարմինների «ոչ իրավաչափ գործողությունների» զոհ: Կառավարությունն էլ մերժել էր այդ առաջարկը` պատճառաբանելով, թե համոզված չէ, որ զոհերի մահը ոչ իրավաչափ գործողությունների հետևանք է եղել:
Թեև կառավարությունը մերժել է փոխհատուցում հատկացնել, այնուամենայնիվ, Մարտի 1-ի զոհերի հարազատները նամակ են հղել Տիգրան Սարգսյանին:
«Ազատություն» ռադիոկայանի թղթակցի հետ զրույցի ժամանակ Մարտի 1-ի զոհերից Գոռ Քլոյանի հայրը` Սարգիս Քլոյանը, հետևյալ կերպ է բացատրել իրենց այդ նախաձեռնությունը. «Իմաստ ունի նրա համար, որ վարչապետը չիմանա, թե մենք ոչինչ չգիտենք։ Մենք ամեն ինչ էլ գիտենք, ամեն ինչից էլ տեղյակ ենք, հասկացրեցինք նամակով, որ Մարտի 1-ի սպանությունները բացահայտված է, իրավաչափությունը` ինքը ասում է բացահայտված չէ, մենք պնդում ենք, որ բացահայտված է, ինչի մասին է խոսքը»:
Նա նկատի ունի Սամվել Նիկոյանի գլխավորած խորհրդարանական ժամանակավոր հանձնաժողովի եզրակացությունը այն մասին, որ մարտյան դեպքերի ժամանակ կիրառվել է «Չերյոմուխա-7» տեսակի հատուկ միջոց, որից մահացել է երեք քաղաքացի: Այս դեպքում ինչպե՞ս է վարչապետը կասկածում ոչ իրավաչափության հանգամանքի վրա, հարցնում են մարտի 1-ի զոհերի հարազատները։
Անդրադառնալով փոխհատուցման վերաբերյալ կառավարության մերժմանը` «Մարտի 1» հասարակական կազմակերպության փոխնախագահը նշել է, թե իրենց համար այն զարմանալի չէր։ «Եթե կառավարությունը որոշեր փոխհատուցել մեզ, ապա ինքնըստինքյան կընդուներ, որ մեր որդիները մահացել են հենց իրենց մեղքով», – նկատել է Քլոյանը։
Երկուշաբթի օրը Մարտի 1-ի գործով քննչական խմբի նոր ղեկավար, Հատուկ քննչական ծառայութան քննիչ Վաղինակ Ջանազյանը հանդիպելու է լրագրողների հետ:
«Եթե միայն ասելու է` «ես նոր եմ ղեկավար, ես պետք է ուսումնասիրեմ գործերը», եթե երեք տարի ու կես Վահագն Հարությունյանը դեռ ուսումնասիրում է, իսկ նոր ղեկավարը նույնպես մի երեք, չորս, հինգ տարի էլ պետք է ուսումնասիրի, այդպիսով ուզում են քնեցնել մեր գործը»,- ասաց Սարգիս Քլոյանը` ամփոփելով. – «Ես ոչ մի ակնկալիք չունեմ, որ կբացահայտվի, կամ փոխհատուցում կտան։ Ես մի հույս ունեմ` և Եվրոդատարան, և իշխանափոխությունից հետո ամեն ինչ կբացահայտվի»։
