Իսրայելի պաշտպանության նախարար Էհուդ Բարաքը, մեկնաբանելով Սիրիայում տիրող իրավիճակը, հայտարարել է, որ Սիրիայի գործող նախագահ Բաշար Ալ-Ասադը դատապարտված է, և նրա հեռացումը «օրհնություն» կլինի ողջ մերձավորարևելյան տարածաշրջանի համար: Այս մասին հաղորդում է France 24 հեռուստաալիքը:
«Բաշար Ալ-Ասադի տապալումը օրհնություն կլինի ամբողջ Մերձավոր Արևելքի համար: Ասադների կլանը դատապարտված է, և ոչ ոք չգիտի, թե նրա հեռանալուց հետո ինչ է կատարվելու»,- ասել է Բարաքը՝ հավելելով, որ «ի վերջո, այս ամենը թուլացնելու է Իրան-«Հըզբոլլահ» առանցքը»:
Միաժամանակ ՄԱԿ-ի մարդու իրավունքների գծով Իսրայելի ներկայացուցիչ Նավի Պիլայը, ելույթ ունենալով հերթական նիստի ժամանակ, բարձրաձայնել է Սիրիայի խաղաղ բնակիչների կորուստների մասին:
Հիշեցնենք, որ Սիրիայում շարունակվում են մարտից սկսված հակակառավարական ցույցերը, որի մասնակիցները պահանջում են նախագահ Բաշար Ալ-Ասադի հեռացումը և բարեփոխումների անցկացում: Իշխանությունները գնացել են որոշ զիջումների, սակայն ընդդիմության ներկայացուցիչները հրաժարվում են խաղաղ բանակցությունների սեղանի շուրջը նստել: Այս ցույցերի ընթացքում, ըստ ՄԱԿ-ի տվյալների, սպանվել է 4000 բնակիչ: Սիրիայի իշխանությունները իրենց հերթին հայտարարում են, որ որոշ շրջաններում նրանց դիմադրում են լավ զինված ահաբեկչական խմբեր, ուստի ստիպված են ներգրավել բանակային ստորաբաժանումները:
