News Georgia-ի փոխանցմամբ՝ երեկ Թբիլիսիում տեղի է ունեցել ընդդիմադիր միլիարդատեր Բիձինա Իվանիշվիլիի նախաձեռնած «Վրացական երազանք» շարժման շնորհանդեսը, որին ներկա է գտնվել մոտ 5000 մարդ։
Իր ելույթում Իվանիշվիլին նշել է, որ 2003 թվականին Վրաստանում իրականացված «Վարդերի հեղափոխությունը» որոշակի հաջողություններ է բերել Վրաստանին. «Դա մասնավորապես վերաբերում է ոստիկանության ոլորտում արված բարեփոխումներին։ Սակայն դրա հետ մեկտեղ քաղաքացիական հասարակությունը կոշտ ձևով հեռացվել է պետական ղեկավարումից, խախտվել է տեղական ինքնակառավարման համակարգը, ամենուրեք տիրում է էլիտար կոռուպցիա։ Վրաստանում ամենուրեք խախտվում են մարդկանց իրավունքները։
Առողջապահության ոլորտում չի իրականացվել որևէ լուրջ բարեփոխում։ Անուշադրության է մատնվել նաև վրացական մշակույթը։ Հազարավոր մարդիկ բանտերում գտնվում են անմարդկային պայմաններում։ ԶԼՄ-ների մեծ մասը գտնվում է կախյալ վիճակում և ապատեղեկացնում է հասարակությանը։ Դատական համակարգը թափանցիկ չէ։ Երկրում նախադրյալներ չկան միջին խավի ձևավորման համար։ Ինտենսիվորեն աճում է գործազրկությունը։ Ծայրահեղ դրություն է առաջացել գյուղերում, որոնք աղքատանում և ամայանում են։ Ժողովրդագրական ցուցանիշի անկումը մեր հաջորդ սերնդին սպառնում է ազգային աղետով։
Իշխանությունները փորձում են վարկաբեկել Վրաց ուղղափառ եկեղեցուն։ Նրանց վարած քաղաքականության բաղկացուցիչ մասերից մեկը ներքին հակամարտության բորբոքումն է և Վրաց ուղղափառ եկեղեցու վարկաբեկումը։ Եթե չլիներ պատրիարքի իմաստունությունը, ապա անխուսափելի կդառնար բախումը ժողովուրդների և կրոնական փոքրամասնությունների միջև։
2008 թվականի օգոստոսյան պատերազմը մեծ հարված հասցրեց Վրաստանին։ Վրաստանի տարածքի զգալի մասն օկուպացված է։ Հազարավոր հարկադիր վերաբնակներ ապրում են սարսափելի պայմաններում։ Ընդ որում, միջազգային կազմակերպությունների նյութերի վերլուծությունը ցույց է տալիս, որ կարելի էր խուսափել այդ հակամարտության էսկալացիայից: Ավելին, հնարավոր էր անգամ խաղաղ բանակցությունների հաջող զարգացումը, եթե չլինեին մեր իշխանությունների ծանր սխալները»։
Հիշեցնենք, որ Վրաստանում «Վարդերի հեղափոխությունը» տեղի է ունեցել 2003 թվականի նոյեմբերի 2-4-ը։ Հեղափոխության հիմնական մոտիվը 2003 թվականի նոյեմբերի 2-ի խորհրդարանական ընտրությունների կեղծումն էր։ «Վարդերի հեղափոխության» արդյունքում Վրաստանի նախագահ Էդուարդ Շևարդնաձեն վայր դրեց իր լիազորությունները, և երկրի ղեկավարությունն անցավ ընդդիմադիրներին, որոնց գլխավորում էր Միխեիլ Սաակաշվիլին։