«Առաջին լրատվական»-ի հավաստի տեղեկություններով, 2012թ. հունվարին Ադրբեջանում ԱՄՆ արտակարգ և լիազոր դեսպան Մեթյու Բրայզան կթողնի դեսպանի պաշտոնը:
2011թ. դեկտեմբերի 1-ին, անդրադառնալով դեսպանի պաշտոնում իր հետագա ճակատագրին Բրայզան ասել էր.
«ԱՄՆ նախագահ Բարաք Օբաման երկրորդ անգամ Ադրբեջանում ԱՄՆ դեսպանի պաշտոնում Սենատին առաջադրել է իմ թեկնածությունը։ Ես սպասում եմ Սենատի որոշմանը։ Այնպիսի ժողովրդավարական համակարգ ունեցող երկրում, ինչպիսին որ մեր երկրում է, իշխանական ցանկացած ճյուղ ունի իր անկախ լիազորությունները։ Սենատն իմ հարցով որոշում է ընդունելու նախքան Կոնգրեսի արձակուրդ գնալը։ Սակայն դրա ստույգ ժամկետը հայտնի չէ»։
Մեր աղբյուրները հայտնում են, որ հաշվի առնելով այն հանգամանքը, որ 2012 թվականին ԱՄՆ-ում տեղի են ունենալու նախագահական ընտրություններ, Սպիտակ տունը չի ցանկանում ընդդիմանալ Հայկական լոբբիին, ուստի վերջնական որոշում է կայացվել, որ Բրայզան վայր կդնի իր լիազորությունները»։
Անցյալ ամիս, Ադրբեջանում ԱՄՆ դեսպանատան մամլո ծառայության ղեկավար Քիթ Բինը հաստատել էր, որ տարեվերջին Բրայզան մեկնելու է Վաշինգտոն, ուր Սենատում քննարկելու են նրա թեկնածության հարցը:
Հիշեցնենք, որ 2010 թվականի դեկտեմբերի 30-ին Բարաք Օբաման, օգտվելով իր սահմանադրական իրավունքից և որ Կոնգրեսը գտնվում է արձակուրդում, Մեթյու Բրայզային նշանակեց Ադրբեջանում ԱՄՆ դեսպանի պաշտոնում։
