Մայր աթոռի մամլո դիվանից «Առաջին լրատվական»-ին տեղեկացնում են, որ դեկտեմբերի 10-ին Մայր աթոռ Ս. Էջմիածնում Գարեգին Բ Ամենայն հայոց կաթողիկոսն ընդունել է Լիբանանի Հանրապետության նախագահ Միշել Սուլեյմանին` ուղեկցությամբ ՀՀ արտգործնախարար Էդվարդ Նալբանդյանի:
Վեհափառ Հայրապետը ողջունել է Լիբանանի նախագահի այցը Հայ առաքելական սուրբ եկեղեցու հոգևոր կենտրոն` անդրադառնալով Մայր աթոռի հիմնադրման պատմությանը և առաքելությանը հայ ժողովրդի կյանքում:
«Մեր ազգային և եկեղեցական պատմությունը հարուստ է մեր երկու ժողովուրդների բարեկամության վերաբերյալ վկայություններով: Եվ ուրախ ենք, որ այսօր հարաբերությունները Հայաստանի և Լիբանանի միջև դարավոր այդ բարեկամության ոգուն համահունչ են զարգանում, վերականգնվում են փոխայցելությունները», – ասել է Ամենայն հայոց կաթողիկոսը:
Կաթողիկոսը Լիբանանի նախագահին շնորհակալություն է հայտնել Լիբանանի իշխանություններին և ժողովրդին Ցեղասպանությունը ճանաչելու և դատապարտելու համար, ինչպես նաև Լեռնային Ղարաբաղի խնդրի խաղաղ կարգավորման գործընթացին ցուցաբերվող զորակցության համար:
Իր հերթին, Լիբանանի նախագահը գնահատանքով է անդրադարձել հայերի պատմական ներկայությանը Լիբանանում և կարևոր ծառայությանը երկրի քաղաքական, տնտեսական և մշակութային կյանքում:
Մ. Սուլեյմանը նաև հույս է հայտնել, որ նորին Սրբությունն առաջիկային կայցելի Լիբանան:
Հանդիպմանը նաև անդրադարձ կատարվեց Հայ եկեղեցու միջեկեղեցական և միջկրոնական հարաբերություններին:
Վերջում Ամենայն հայոց կաթողիկոսը մաղթել է, որ Աստված օրհնի և հարատև զորացնի բարեկամությունը երկու ժողովուրդների:
Այնուհետև Նորին Սրբությունը նախագահին առաջնորդել է Մայր տաճար և Մայր տաճարի թանգարան:
