ՀՀ ԱԳՆ մամլո գրասենյակից «Առաջին լրատվական»-ին տեղեկացնում են, դեկտեմբերի 5-7-ը Ժնևում ՄԱԿ գրասենյակում կայացել է Միգրացիայի միջազգային կազմակերպության խորհրդի 100-րդ հոբելյանական նստաշրջանը, որը համընկել է կազմակերպության 60-ամյակի հետ:
Խորհրդի նստաշրջանի բարձրաստիճան սեգմենտին մասնակցել է ՀՀ պաշտոնական պատվիրակությունը` ԱԳՆ Միջազգային կազմակերպությունների վարչության պետ, դեսպան Վահրամ Կաժոյանի գլխավորությամբ:
Նստաշրջանի ընդհանուր քննարկման շրջանակներում ՀՀ պատվիրակության ղեկավարը հանդես է եկել հայտարարությամբ, որում բարձր է գնահատել կազմակերպության գործունեությունը միգրացիայի ժամանակակից խնդիրներին արդյունավետ արձագանքելու ուղղությամբ:
Իր ելույթում Վահրամ Կաժոյանը ներկայացրել է Հայաստանում միգրացիայի կառավարման ուղղությամբ իրականացվող ծրագրերը, մասնավորապես Սահմանային կառավարման համակարգի ներդրումը, կենսաչափական անձնագրերի և նույնականացման քարտերի կիրառումը:
Նշվել է, որ Հայաստանի միգրացիայի պետական գործակալության կից հիմնվել է Միգրանտների օժանդակության կենտրոն, որը տրամադրում է անհրաժեշտ տեղեկատվություն արտասահմանում աշխատանք փնտրողների համար:
Կաժոյանը կարևորել է միգրանտների ծագման երկրների և ընդունող երկրների միջև համագործակցության ամրապնդումը, վիզային ռեժիմի բարելավումը` ապօրինի միգրացիայի դեմ պայքարի և օրինական միգրացիայի խրախուսման առումով:
Դեկտեմբերի 7-8-ը ՀՀ ԱԳՆ Միջազգային կազմակերպությունների վարչության պետ Վ. Կաժոյանը մասնակցել է նաև 1951 թ. Փախստականների կարգավիճակի վերաբերյալ կոնվենցիայի 60-ամյակին և 1961 թ. Անքաղաքացիության կրճատման վերաբերյալ կոնվենցիայի 50-ամյակին նվիրված նախարարական հանդիպմանը:
Միջոցառմանը մասնակցել են բարձրաստիճան պատվիրակություններ մոտ 145 պետություններից, այդ թվում 4 փոխվարչապետ, 60 նախարար և փոխնախարար, արտաքին և ներքին գործերի նախարարությունների և միգրացիոն ծառայությունների ներկայացուցիչներ, մշտական ներկայացուցիչներ, դեսպաններ:
Հանդիպմանը ՀՀ պատվիրակության ղեկավարն իր խոսքում մասնավորապես ընդգծել է Ֆ.Նանսենի անգնահատելի դերը 1915թ. հայոց ցեղասպանության արդյունքում հազարավոր փախստականներին տարբեր երկրներում ապաստան գտնելու գործում:
Իր ելույթում Վահրամ Կաժոյանը շեշտել է, որ ԼՂ ժողովրդի դեմ Ադրբեջանի կողմից սկսած պատերազմը ստիպեց հազարավոր մարդկանց լքել իրենց բնակավայրերը` դառնալով փախստականներ:
Ադրբեջանի ագրեսիայի, էթնիկական զտումների եւ ատելություն սերմանելու արդյունքում հայազգի բնակչությունը ստիպված էր ամբողջությամբ լքել այդ երկիրը, և 1988թ. ի վեր Հայաստանն ապաստանլ է ավելի քան 400 հազար փախստականի:
Պարոն Կաժոյանը ներկայացրել է փախստականների ինտեգրմանն ուղղված աշխատանքները, մասնավորապես անդրադառնալով նրանց բնակարանային ապահովման խնդիրներին եւ այդ նպատակով Երևանում կայացած դոնորների միջազգային խորհրդաժողովին:
Նա նաև հնչեցրել է փախստականների բնագավառին վերաբերվող Հայաստանի կառավարության կողմից ստանձնելիք հանձնառությունները:
Հանդիպման մասնակիցներն ընդունել են նախարարական կոմյունիկե, որում անդրադարձել են աշխարհում փախստականների և քաղաքացիություն չունեցող անձանց իրավիճակի բարելավման ռազմավարությանը:
