Փաստը, որ Եվրոպական ժողովրդական կուսակցությունը հայաստանյան 3 ուժերի՝ ՀՀԿ-ի, ՕԵԿ-ի և «Ժառանգության» կողքին անարձագանք է թողել իրեն անդամության համար դիմած ԲՀԿ դիմումը, դժվար է պայմանավորել ներքաղաքական զարգացումներով, մասնավորապես՝ ՀՀԿ-ԲՀԿ հարաբերություններով: «Առաջին լրատվական»-ի հետ զրույցում նման տեսակետ հայտնեց քաղաքագետ Երվանդ Բոզոյանը:
«Ես ոչ մի բան չեմ կարող բացառել, բայց կարծում եմ՝ այս խնդիրը հայաստանյան ներքաղաքական զարգացումների հետ չպետք է կապել, քանի որ դա այնքան էլ ճիշտ չի լինի: Միաժամանակ, կարծում եմ, որ հայրենի կուսակցությունների համար բարձր վարկանիշ ունենալու տեսանկյունից առավել կարևոր է նրանց հեղինակություն վայելելը հայաստանցի ընտրողի, ոչ թե եվրոպացի դիտորդների աչքին: Քաղաքական ցանկացած ուժ պետք է փորձի առաջին հերթին իր վարկանիշն ամրապնդել սեփական երկրում, քան դրսում»,- նկատեց քաղաքագետը՝ հավելելով, որ եվրոպական ինչ-ինչ կառույցներին անդամակցելը հայաստանյան կուսակցությունների համար ձևական բնույթ է կրում և հաճախ նպատակ ունի բրենդային կերպար ստեղծել:
«Սա նրանց վարկանիշային որոշակի առավելություն, արժևորում է տալիս»,- ամփոփեց Բոզոյանը:
Հիշեցնենք, որ Եվրոպական ժողովրդական կուսակցությանն անդամակցության հայտ ներկայացրել էին հայաստանյան 4 քաղաքական ուժեր՝ ՀՀԿ-ն, ՕԵԿ-ը, «Ժառանգությունը» և ԲՀԿ-ն: Առաջին երեքի հարցը կքննվի 2012 թվականի փետրվարին, իսկ ԲՀԿ դեպքում ԵԺԿ-ն դեռևս լռություն է պահպանում: