Այն, որ Եվրոպական ժողովրդական կուսակցությունը, հայաստանյան 3 ուժերի՝ ՀՀԿ-ի, ՕԵԿ-ի և «Ժառանգության» կողքին անարձագանք է թողել իրեն անդամության համար դիմած ԲՀԿ դիմումը, ներքաղաքական իրավիճակների հետ կապ չունի: «Առաջին լրատվական»-ի հետ զրույցում նման տեսակետ հայտնեց քաղաքական և ընտրական տեխնոլոգիաների փորձագետ Արմեն Բադալյանը:
«Պատճառները մի քանիսը կարող են լինել: Միգուցե ԲՀԿ-ն լավ չի աշխատել: Կասկածում եմ, որ ԵԺԿ-ն մոռացած լիներ տալ ԲՀԿ անունը, որովհետև եթե հնչեցվել են մյուս երեք կուսակցությունների անունները, ապա բացառված է, որ ԲՀԿ-ին մոռացած լինեին: Մյուս պատճառը կարող է լինել այն, որ ԲՀԿ-ն ընկալվում է որպես «Եդինայա Ռոսիա» կուսակցության հետ դաշինք կնքած, նրա հետ բարիդրացիական հարաբերություններ ունեցող ուժ: Գուցե ԵԺԿ-ն չի ուզում իր կազմում ռուսամետ ևս մեկ ուժ տեսնել»,- նկատեց Արմեն Բադալյանը:
Ամփոփելով՝ քաղաքական և ընտրական տեխնոլոգիաների փորձագետը տեսակետ հայտնեց, որ վաղուց ժամանակն է, որ ԲՀԿ-ն որոշի՝ ի վերջո, հայաստանյան քաղաքական դաշտում իրեն պատկերացնում է որպես ռուսակա՞ն, թե՞ արևմտյան կառույցի դաշնակից:
