Ստրասբուրգում ռուս իրավապաշտպանները հեռախոսային «թեժ գիծ» են բացել՝ ՌԴ-ում ցույցերի մասնակիցների մարդու իրավունքների խախտման հետ կապված բողոքների համար: Այս մասին հաղորդում է РИА Новости-ն:
Ռուսաստանում խորհրդարանական ընտրությունները տեղի են ունեցել դեկտեմբերի 4-ին: Հաջորդ օրն ընդդիմությունն արտոնված ցույցի էր դուրս եկել, որն ավարտվել էր չարտոնված երթով: Ոստիկանությունը ձերբակալել էր 300 մարդու: Մեկ օր հետո կայացած չարտոնված ցույցի ժամանակ կրկին ձերբակալվել էր համարյա 300 մարդ: Ցույցերը տեղի են ունենում տարբեր քաղաքներում:
Շաբաթ օրը մայրաքաղաք Մոսկվայում տեղի կունենա հերթական ընդդիմադիր ցույցը, որին կմասնակցի 30 հազար մարդ: Ցուցարարների հիմնական պահանջը կլինի նոր խորհրդարանական ընտրությունների անցկացումը:
