Չինաստանում հինգ պաշտոնատար անձ ազատվել է աշխատանքից այն բանից հետո, երբ ալարկոտության դեմ պայքարի կոնֆերանսի ժամանակ նրանց նկատել են քնած կամ թերթ կարդալիս:
Ինչպես հայտնում է Xinhua գործակալությունը, հղում կատարելով տեղական ԶԼՄ-ներին, պատժված պաշտոնյաներն աշխատում էին Չինաստանի հյուսիսային Շանսի մարզի հարկային ծառայությունում: Չի հայտնվում, թե նրանց ինչ ժամկետով են ազատել աշխատանքից:
«Աշխատանքային կարգապահությունը բարձրացնելու արշավը պետք է պաշտոնյաներին հիշեցնի, որ նրանք չեն կարող աշխատանքի ժամին լքել իրենց աշխատավայրը, խաղալ կամ զբաղվել ժամանցային գործունեությամբ»,- հայտնում է գործակալությունը:
Չինաստանի պետական ապարատի աշխատակիցները հաճախ ստիպված են ներկա լինել երկար և ձանձրալի հավաքների, լսել Պեկինից եկած զեկույցներ:
Հիշեցնենք, որ այս տարվա ապրիլին ԱՄՆ փոխնախագահ Ջո Բայդենը հավանաբար քնել էր Բարաք Օբամայի վերջին ելույթի ժամանակ: Այդպիսի եզրակացության են եկել բոլոր նրանք, ովքեր տեսել են այդ միջոցառման տեսագրությունները, որը ամերիկյան ABC հեռուստաալիքը հեռարձակել է իր բլոգում: