Facebook սոցիալական կայքում ստեղծվել է «Ազատ քաղաքացիներն ազատ քաղաքացիների համար» էջը, որի կազմակերպիչները կոչ են անում վաղը` ժ. 12:00-ին, միանալ իրենց ՌԴ դեսպանության դիմաց ու պահանջել անհապաղ ազատ արձակել ընդդիմության առաջնորդներին և ընդդիմադիր հասարակական գործիչներին, թույլատրել անցկացնել խաղաղ ցույցեր և երթեր, ինչպես նաև դադարեցնել ազատ խոսքի դեմ սանձազերծված ապօրինի քաղաքականությունը:
«Ինչպես ժողովրդավարացման ճանապարհին գտնվող, սակայն ավտորիտար ռեժիմներ ունեցող շատ երկրներում, այնպես էլ Ռուսաստանում վերջին ընտրությունները ցույց տվեցին, թե որքան անպաշտպան է մարդը նման պայմաններում, և ինչ է պատահում նրա հետ, երբ փորձ է արվում կազմակերպել բողոքի ակցիաներ կեղծված ընտրությունների և երկրում տեղի ունեցող անօրինականությունների դեմ:
Մենք` Հայաստանում նմանատիպ դրսևորումների դեմ հանդես եկող քաղաքացիներս, մեր վրդովմունքն ենք հայտնում ժողովրդավարացման գործընթացների ջատագովներին բանտերը նետելու քաղաքականության դեմ՝ անկախ նրանից, թե որտեղ է դա տեղի ունենում` Մոսկվայում, Կահիրեում, Մինսկում, թե Մոգադիշոյում»,- նշված է կազմակերպիչների տարածած հայտարարության մեջ:
Ի դեպ, նախաձեռնությանը մասնակցել ցանկացողների թիվը սոցցանցում աստիճանաբար մեծանում է: