Վաղը Ալիևի կուսակցությունը նույնպես կարող է դառնալ ԵԺԿ անդամ: Այսօր լրագրողների հետ հանդիպմանը ասաց ԱԻՄ առաջնորդ Պարույր Հայրիկյանը` անդրադառնալով վերջին օրերին քննարկված ԵԺԿ անդամակցությանը:
Ըստ ԱԻՄ առաջնորդի` Եվրոպական ժողովրդական կուսակցությունը Եվրոպական միության անդամ պետությունների համար է: «Այդ կուսակցության հետ մենք կարող ենք միայն համագործակցել: Ժողովրդական կուսակցությունը պահպանողական լինելուց բացի` քրիստոնեա-դեմոկրատական կառույց է: Վաղը կարող է Ալիևի կուսակցությունը նույնպես դառնալ դրա անդամ»,- մեկնաբանեց Պ. Հայրիկյանը` մերձեցումը համարելով շատ լուրջ քայլ:
Պարույր Հայրիկյանի համոզմամբ` մերձեցումը կարելի է շահեկան համարել, ինչն ամրագրվեց կուսակցությունների մակարդակով: Նա նշեց, որ ՀՀԿ-ն և ձախակողմյան ուժերը կատարեցին մերձեցման քայլ, որը կուսակցությունների եվրոպական կողմնորոշման ապացույցն է. արժեքային համակարգի մասին է խոսքը` մարդու իրավունքների:
ԱԻՄ ղեկավարը չի բացառում, որ ԵԺԿ-ին անդամագրվելու ցանկություն հայտնած կուսակցությունները կարող են միավորվել, այլապես նրանք համագործակցելու հեռանկար չեն ունենա: Ըստ Պ. Հայրիկյանի` կուսակցություններն ավելի շատ են, քան գաղափարախոսությունները, իսկ Եվրոպայում կան աջակողմյաններ և ձախակողմյաններ:
