Այսօր ՀՀ ԱԺ-ում խմբակցությունների ճեպազրույցի օրն էր:
ՀՅԴ խմբակցության ներկայացուցիչ Արտյուշա Շահբազյանը անդրադառնալով խորհրդարանի գործունեությանը` նշեց, որ գոհ չեն, սակայն բավարարված են աշնանային նստաշրջանում կատարված աշխատանքներով:
«Մենք հանդես ենք եկել մեր դիմագծով` և՛ ընդդիմադիր կեցվածք ենք ունեցել, և՛ կառուցողական. միաժամանակ լինել կոշտ, բայց ոչ էժան պոպուլիստ»,- ասաց Շահբազյանը:
Խմբակցության մեկ այլ անդամ` Արծվիկ Մինասյանը, նկատեց, որ կառավարությունը չի կարող հենց այնպես խոստանալ, հետո դրանք չկատարել: Կառավարությանն անվստահություն հայտնելու վերաբերյալ ՍԴ դիմելու հարցով նա նշեց, որ շարունակում են գործընթացը, պատրաստվում են դիմել ՍԴ, հիմա դիմումի հստակեցման փուլում են, ձգտում են այս տարվա մեջ դիմել ՍԴ:
«Մենք մեր վարքագիծը չենք կապում ընտրությունների և էժան քվե շահելու հետ»,- նշեց Մինասյանը` պատասխանելով հարցին` արդյոք դա նախընտրական քայլ չէ՞:
Անդրադառնալով Սամվել Նիկոյանի` ԱԺ նախագահի պաշտոնւմ ՀՅԴ քվեարկությանը և այդ առիթով «Ժառանգության» ներկայացուցչի հայտարարությանը, թե` միակ ընդդիմությունը «Ժառանգությունն» է, Շահբազյանը ասաց, որ «Ժառանգությունը» լուրջ չէր վերաբերվում այդ քվեարկությանը:
«Ի՞նչ կապ ունի ԱԺ նախագահի թեկնածուի նախընտրական ելույթը, որտեղ հարվածում են Դաշնակցության պատմությունը և կեղծում»,- նշեց Շահբազյանը` ըստ էության արդարացնելով «ազատ» քվեարկությամբ իրենց խմբակցության աջակցությունը իշխող Հանրապետականին: