ИТАР-ТАСС-ի փոխանցմամբ՝ Իրանը ՄԱԿ-ից պահանջել է պաշտպանել իրեն ԱՄՆ-ից։ Այս մասին նշված է ՄԱԿ-ի ղեկավարությանը հասցեագրած ՄԱԿ-ում Իրանի մշտական ներկայացուցիչ Մուհամեդ Հազաիի երեկվա նամակում։
Այդպիսի նամակ ստացել են ՄԱԿ-ի գլխավոր քարտուղար Պան Գի Մունը, ՄԱԿ ԱԽ նախագահ Վիտալի Չուրկինը և ՄԱԿ ԳԱ 66-րդ նստաշրջանի նախագահ Նասիր Աբդուլազիզ Ալ-Նասերը։
Նամակում նշված է. «Ոչ վաղ անցյալում ամերիկյան RQ-170 լրտես անօդաչու ինքնաթիռը, որն ունեցել է կոնկրետ սերիական համար, խախտել է Իրանի օդային սահմանը։ Ապա այն Իրանի տարածքում խորացել է 250 կիլոմետր՝ հասնելով մինչև հյուսիսում ընկած Թաբաս քաղաք, ուր և ստացել է Իրանի զինված ուժերի կողմից վճռական պատասխան։
Մեր կառավարությունն ընդգծում է, որ ԱՄՆ-ի կառավարության այս քայլը թշնամական ակտ է՝ ուղղված Իրանի դեմ, ինչպես նաև միջազգային իրավունքի, այդ թվում՝ նաև ՄԱԿ-ի կանոնադրության հիմնական սկզբունքների խախտում։ Իրանն իրեն իրավունք է վերապահում ձեռնարկել բոլոր անհրաժեշտ միջոցները իր ազգային ինքնիշխանության պաշտպանության համար։
Միջազգային հանրությունը պետք է հստակ և արդյունավետ միջոցներ ձեռնարկի այդ վտանգավոր ու ապօրինի ակտերի շարունակմանը վերջ դնելու ուղղությամբ»։
