«Երեկ տեղեկություն ստացանք, որ «Շանթ» հեռուստաընկերությունն էլ է հունվարից ընդգրկվելու «Սի էս մեդիա»-ի կազմի մեջ: Դրա մեջ արդեն ընդգրկված են մի քանի հեռուստաընկերություն ու FM 107 ռադիոկայանը, իսկ «Սի էս մեդիա»-ի նախագահն է «Արմենիա» հեռուստաընկերության համասեփականատեր Բագրատ Սարգսյանը»,- գրում է «ՀԺ»-ն և հավելում.
««Շանթ» հեռուստաընկերության PR մենեջեր Լիանա Մարտիրոսյանը այսպես արձագանքից. «Այդ տեղեկությունները չեն համապատասխանում իրականությանը: Նման բան չկա: «Սի էս մեդիա»-ի կազմի մեջ «Շանթը» չի մտել և չի մտնելու»: Նա պնդեց, որ նման հարց չի քննարկվում:
Հիշեցնենք, որ ավելի վաղ սոցիալական ցանցերում լուրեր էին շրջում, թե Սերժ Սարգսյանի փեսա և աշխատակազմի ղեկավարի արդեն նախկին տեղակալ Միքայել Մինասյանը մտադիր է ձեռք բերել նաև «Շանթ» հեռուստաընկերությունը: Այժմ հենց Մինասյանն է վերահսկում «Արմենիա» հեռուստաընկերությունը: Նրա անվան հետ են կապվում նաև մի շարք այլ հեռուստաընկերություններ: Ու եթե հաշվի առնենք, որ հենց Մինասյանի շրջապատի ներկայացուցիչ՝ Սերժ Սարգսյանի նախկին խոսնակ Սամվել Ֆարմանյանն է Հ1-ի փաստացի ղեկավարը, հասկանալի կդառնա, որ «Շանթի» հետ կապված խոսակցությունները ամենևին էլ պատահաբար չեն դրվում շրջանառության մեջ: Հեռուստատեսային եթերը տոտալ վերահսկողության տակ առնելու գործընթաց է սկսված»: