«Երեկ երեկոյան խոշոր ավտովթար է տեղի ունեցել Երևանում: Ինչպես դեպքի վայրից aravot.am-ին հայտնեց ֆոտոլրագրող Գագիկ Շամշյանը, ժամը 20:20-ի սահմաններում Խանջյան փողոցից դեպի Հերացի փողոց բարձրացող թունելում իրար են բախվել 4 ավտոմեքենա, այդ թվում՝ «Մերսեդես», «Օպել Վեկտրա», «Վազ 2106» և «Վազ 2107» մակնիշի ավտոմեքենաներ:
Դեպքի վայր են ժամանել ԱԻՆ Հայաստանի փրկարար ծառայության փրկարարները, ինչպես նաև ոստիկանության՝ Երևան քաղաքի վարչության, պարեկապահակային ծառայության աշխատակիցները, ովքեր մեքենայից դուրս են բերել վիրավորին:
Նշված հատվածում երթևեկությունը մասամբ կաթվածահար է եղել, այդ իսկ պատճառով դեպքի վայր են ժամանել Երևանի ՃՈ մի քանի անձնակազմ»,- գրում է «Առավոտ»-ը և հավելում.
«Դեպքի վայրում իրավիճակը լարված Է եղել, քանի որ հավաքվել էին տաքացած երիտասարդներ: Այդ մասին տեղեկացվել է ոստիկանության Կենտրոնականի բաժնի պետին, ով խոստացել է լրացուցիչ ուժեր ուղարկել դեպքի վայր, սակայն ահազանգից 10 րոպե անց դեռևս ոստիկանները չէին ժամանել: Ֆոտոլրագրողը հայտնեց նաև, որ «Մերսեդես» ավտոմեքենայի ուղևորները՝ մի քանի երիտասարդ, հարձակվել են իր վրա փորձելով խլել տեսախցիկը, բարեբախտաբար՝ ոստիկանները կարողացել են նրանցից մի քանիսին բռնել, սակայն մինչ այդ նրանք հասցրել են քաշքշել Գագիկ Շամշյանին, հարվածել են դեմքին և սեռական հայհոյանքներ տվել:
Ֆոտոլրագրողը ոստիկանության Կենտրոնականի բաժնում ցուցմունքներ է տվել: Նրանից խլել են հեռախոսը, ժամացույցը, վնասել դեմքը, սակայն, ինչպես նշել է նա, «բարեբախտաբար, լուսանկարչական ապարատս չկարողացան խլել»: