Ստեղծված իրավիճակում «Բարգավաճ Հայաստան» կուսակցության լռությունը միանգամայն տրամաբանված մարտավարություն է: «Առաջին լրատվական»-ի հետ զրույցում նման տեսակետ հայտնեց քաղաքագետ Հմայակ Հովհաննիսյանը:
«Ստեղծված պայմաններում սա ԲՀԿ համար ամենաշահեկան կեցվածքն է: Երրորդ ուժի կարգավիճակում հանդես գալու նրա ձգտումը որևէ մեկի մոտ կասկած չի առաջացնում, և ակնհայտ է, որ այդ ձգտումը կա: Այն կյանքի կոչելու համար միանգամայն տրամաբանական է ստեղծված իրավիճակում կռվախնձոր չդառնալ, ձգտել սեփական ինքուրույնությունը գտնել և որպես երրորդ ուժ՝ գնալ ինքնուրույն ճանապարհով:
Այս լռությունը կոչված է ցույց տալու կուսակցության վճռականությունը՝ գնալու սեփական ճանապարհով և չձայնակցելու որևէ մեկին՝ ո՛չ ՀՀԿ-ին, ո՛չ էլ արմատական ընդդիմությանը, այսինքն՝ ընտրելու երրորդ ուժի ուղին: ԲՀԿ-ն իր լռությամբ ակնարկում է, որ մոտեցումը պետք է մրցակից ուժերի կողմից դիտվի որպես իրենց համար չարյաց փոքրագույնը, որովհետև եթե ԲՀԿ-ն ձայնակցում է նրանցից մեկնումեկին՝ ՀՀԿ-ին կամ ՀԱԿ-ին, մյուսը հայտնվում է չափազանց դժվար իրավիճակում: Դրա համար այս լռությունն իր մեջ ակնարկ է պարունակում, որ երկուսն էլ պիտի գիտակցեն՝ իրենց համար չարյաց փոքրագույնն է, որ ԲՀԿ-ն հանդես գա որպես ինքնուրույն և չլինի որևէ մեկի կցորդը»,- նկատեց քաղաքագետը:
