Լեռնային Ղարաբաղի հարցով երեկ Վիլնյուսում ընդունված հայտարարությունն, ըստ էության, հրադադարի ռեժիմի խախտումների դեմ ուղղված քայլ էր: «Առաջին լրատվական»-ի հետ զրույցում նման տեսակետ հայտնեց ԼՂ նախկին արտգործնախարար Արման Մելիքյանը՝ անդրադառնալով ԵԱՀԿ Մինսկի խմբի համանախագահ երկրների պատվիրակությունների ղեկավարների` ԱՄՆ պետքարտուղար Հիլարի Քլինթոնի, Ռուսաստանի արտգործնախարար Սերգեյ Լավրովի, Ֆրանսիայի եվրոպական գործերով նախարար Ժան Լեոնետիի և Հայաստանի ու Ադրբեջանի արտգործնախարարներ Էդվարդ Նալբանդյանի և Էլմար Մամեդյարովի ստորագրած հայտարարությանը, որում վերահաստատված է Լեռնային Ղարաբաղի հակամարտության խաղաղ կարգավորմանը հասնելու կարևորությունը։
«Հայտարարության այն հատվածը, ուր խոսվում է հրադադարի խախտումները հետաքննելու մեխանիզմի մանրամասների վրա աշխատելու մասին, կազմակերպչական առումով ԵԱՀԿ Մինսկի խմբի համանախագահների և դիտորդների համար բավական բարդ է լինելու: Եթե չլինի հակամարտող կողմերի բարի կամքը, սահմանին տեղի ունեցող միջադեպերը շարունակվելու են, հետաքննությունները գնալով շատանալու են, իսկ սա նշանակելու է, որ գուցե միջնորդ պետությունները կտրուկ միջոցներ ձեռնարկեն, այդ թվում՝ տարածաշրջանում խաղաղապահներ մտցնելու տեսքով: Սա խնդրի մեկ մասն է, որը ես անընդունելի եմ համարում:
Ադրբեջանը կարող է փորձել սահմանին միջադեպերը շարունակելով՝ համանախագահներին ստիպել լրջորեն վերաբերվել զորք մտցնելու խնդրին: Մյուս կողմից՝ կրակի դադարեցման պահպանումը միտված է ստատուս քվոյի պահպանությանը, քանի դեռ կողմերը ընդհանուր հայտարարի չեն եկել: Իսկ ստատուս քվոյի պահպանությունը դրական է, և կարծում եմ՝ բխում է մեր շահերից: Ուղղակի կարևոր է, որ գործը իսկապես մնա միջադեպերի հետաքննության մակարդակում՝ առանց լրացուցիչ խաղաղապահ ուժեր տարածաշրջան մտցնելու»,- ամփոփեց Արման Մելիքյանը:
