Թուրքական Doğan լրատվական գործակալության փոխանցմամբ, Թուրքիայի զինված ուժերի Գլխավոր շտաբը գրավոր պատասխանել է թուրքական Radikal թերթի լրագրող Էզգի Բաշարանի նամակին, որն առնչվում է թուրքական բանակի կողմից «Քրդստանի աշխատավորական» կուսակցության (PKK) զինյալների դեմ քիմիական զենքի գործածմանը։
Գլխավոր շտաբի պատասխան նամակում նշված է. «Մի շարք տեղական և օտար ԶԼՄ-ներով տարածվում է անհիմն տեղեկատվություն՝ Թուրքիայի զինված ուժերի կողմից ահաբեկիչների նկատմամբ քիմիական զենքի գործածման մասին։ Սակայն Թուրքիայի զինված ուժերի Գլխավոր շտաբի բազաներում գոյություն չունի քիմիական զենք։ Ահաբեկչական կազմակերպությունների դեմ Թուրքիայի մղած պայքարն ընթանում է իրավական նորմերի շրջանակներում»։
Հիշեցնենք, որ Թուրքիայի խորհրդարանում ներկայացված քրդական միակ լեգալ՝ «Խաղաղություն և ժողովրդավարություն» կուսակցության (ԽԺԿ) ներկայացուցիչ Մերալ Դենիշ Բեշթաշը ներկայումս թուրքական իշխանություններին մեղադրում է քրդերի դեմ քիմիական զենք գործածելու մեջ։ Մերալը ներկայացնում է մոտ 1.5 ամիս առաջ վնասազերծված 24 քուրդ զինյալների դիակների լուսանկարները, որոնք օրեր առաջ սպանվել են Իրաքին սահմանակից Քազանի հովտում։
Մերալը վստահեցնում է, որ այդ 24 քուրդ զինյալները, որոնց դիակները գտնվում են Մալաթիայի հիվանդանոցի դիահերձարանում, սպանվել են քիմիական զենքի գործածման արդյունքում։ Մերալն իշխանություններից պահանջել է ներկայացնել փորձաքննության արդյունքները, ինչը ցայժմ չի տրամադրվել։ Ավելին՝ դիակները մինչ օրս չեն փոխանցվում զոհվածների հարազատներին, չնայած վերջիններիս պահանջներին։
Ի դեպ, սա առաջին դեպքը չէ, որ թուրքական բանակը մեղադրվում է քուրդ զինյալների դեմ քիմիական զենք կիրառելու մեջ։ 2009 թվականին գերմանական Der Spiegel պարբերականը հանդես էր եկել նմանատիպ մեղադրանքով։
1999 թվականի մայիսի 11-ին Թուրքիայի հարավարևելյան հատվածում ընկած քրդաբնակ Շըրնաք նահանգի Սիլոփի շրջանի Բալլըքայա գյուղի մոտ տեղի ունեցած բախման ժամանակ թուրքական բանակը քիմիական զենք է կիրառել քուրդ զինյալների դեմ, ինչի արդյունքում տեղում զոհվել է 20 քուրդ զինյալ։
Այս գործողությունը գլխավորել է Թուրքիայի զինված ուժերի գլխավոր շտաբի ներկայիս պետ Նեջդեթ Օզելը, ում դրա համար քրդերը տվել են «Քիմիական Նեջդեթ» մականունը։
