«Բարգավաճ Հայաստան»-ի մամուլի խոսնակը հայտարարել է, որ Լևոն Տեր-Պետրոսյանն իրենց հետ համագործակցության առաջարկ չի արել, այլ արել է քաղաքագիտական վերլուծություն, հետևաբար իրենք դա ընդունել են ի գիտություն և պարտավորված չեն պատասխանել:
Հասկանալի է, որ «Բարգավաճ Հայաստան»-ի համար պատասխան տալն իսկապես դժվար է: Միգուցե ԲՀԿ-ն ունի պատրաստ պատասխան, որը բխում է կուսակցության սրտի և մտքի խորքից, բայց հասկանալի է, որ այդ պատասխանը բարձրաձայնելը շատ բարդ է, որովհետև ենթադրելու է թե՛ քաղաքական, թե՛ նույնիսկ իրավական պատասխանատվություն: Իրավական, իհարկե, ոչ թե կուսակցության, այլ կուսակցական առանձին անձանց մասով: Խոսքը, օրինակ, Ջերմուկի ԲՀԿ տարածքային կառույցի ղեկավարի ձերբակալության մասին է, որին ձերբակալել էին թմրանյութեր պահելու համար: Չի բացառվում, որ մի քանի այլ տարածքային կառույցներում ևս պարզվի, որ ԲՀԿ ղեկավարները խնդիրներ ունեն օրենքի հետ: Ավելին, եթե նույնիսկ չունենան էլ, իշխանությունը Հայաստանում ցույց է տվել, որ ընդդիմության պարագայում կարող է ցանկացածի մոտ խնդիրներ հարուցել և ձերբակալել ու առնվազն մի քանի ամիս բանտարկել:
Նման պայմաններում ԲՀԿ համար իսկապես դժվար է պատասխանատվություն ստանձնել և խոսել Կոնգրեսի հետ համագործակցելու մասին: Սակայն մեկ այլ հանգամանք էլ կա: Բանն այն է, որ ԲՀԿ-ն Կոնգրեսին փորձում է մղել առավել հստակ հայտարարության, այլ կերպ ասած՝ առաջարկության: Այսինքն` ԲՀԿ-ն ուզում է, որպեսզի Կոնգրեսը կամ դրա ղեկավարն ավելի պարզ ասեն, թե ինչ են ուզում իրենցից:
Միգուցե կասկած չկա, որ Կոնգրեսն ու ԲՀԿ-ն կարող էին ունենալ ստվերային շփումներ, անգամ Տեր-Պետրոսյանի ելույթից առաջ, բայց երբ ԲՀԿ-ն ակնարկում է հստակ առաջարկի բացակայության մասին, նշանակում է` ստվերային տիրույթում բացակայում է որևէ փոխըմբռնում և առաջընթաց ինչ-որ պայմանավորվածությունների հարցում: Այդ պայմաններում ԲՀԿ-ն միգուցե փորձում է կամ վերջ տալ այդ շփումներին և այդ պատճառով է փորձում հրապարակայնացնել առաջարկի գաղափարը` այդպիսով փակելով թեման, կամ էլ «Բարգավաճ Հայաստան»-ը Կոնգրեսին փորձում է հասկացնել, որ ժամանակն է ավելի կոնկրետ և առարկայական շփումների գնալ և հստակ ասել ցանկություններն ու պլանները:
«Բարգավաճ»-ի այդ դիրքորոշումը կարծես թե ինչ-որ առումով վկայում է այն մասին, որ Կոնգրես-ԲՀԿ տիրույթում, այնուամենայնիվ, իրեն ավելի ինքնավստահ է զգում ԲՀԿ-ն, որը չնայած հայտնվել է ծանր կացության առջև, այնուամենայնիվ զգում է, որ Կոնգրեսն էլ ավելի ծանր կացության մեջ հայտնվելու արդյունքում է դիմել իր օգնությանը: Այսինքն` «Բարգավաճ Հայաստան»-ն այս հարթությունում իրեն ավելի ուժեղ է զգում` երևի թե համարելով, որ ինքն առանց Կոնգրեսի էլ յոլա գնալու բազմաթիվ այլ տարբերակներ ունի, իսկ ահա Կոնգրեսն առանց իրեն կարող է և յոլա չգնալ կամ ընտրություն կատարել արդեն յոլա գնալու առավել անցանկալի տարբերակների միջև: