Ադրբեջանական APA լրատվական գործակալության փոխանցմամբ՝ Ադրբեջանի փոխարտգործնախարար Խալաֆ Խալաֆովը հայտարարել է, որ Ադրբեջանն ու Ռուսաստանը կարող են նոր պայմանագիր ստորագրել Ադրբեջանում գտնվող և Ռուսաստանի կողմից վարձակալված Գաբալայի ռադիոտեղորոշիչ կայանի (ՌՏԿ) վերաբերյալ.
«Գաբալայի ՌՏԿ-ի վարձակալության ժամկետը սպառվում է հաջորդ տարի։ Ադրբեջանն ու Ռուսաստանը պետք է բանակցեն պայմանագրի երկարաձգման վերաբերյալ։ Պայմանագիրը կարող է կա՛մ երկարաձգվել նույն տեսքով, կա՛մ երկարաձգվել փոփոխություններով, կա՛մ էլ ընդհանրապես չերկարաձգվել։ Չի բացառվում նաև նոր համաձայնագրի կնքումը։
Պայմանագրում արտացոլվելու են հիմնական պայմանները։ Օրակարգում են լինելու վարձավճարի ավելացումն ու կայանի արդիականացման հարցը։ Ներկայումս Գաբալայի ՌՏԿ-ի վերաբերյալ բանակցություններն ընթանում են երկու երկրների Պաշտպանության նախարարությունների միջև և կրում են խորհրդատվական բնույթ։ Հետագայում բանակցություններն անցկացվելու են կառավարությունների մակարդակով»։
Խալաֆովը հավելել է, որ ներկայիս պայմանագրով Ռուսաստանն առանց ադրբեջանական կողմի համաձայնության իրավունք չունի Գաբալայի ՌՏԿ-ից ստացված տվյալները փոխանցել երրորդ երկրին (նկատի է առնվում Հայաստանը)։
Հիշեցնենք, որ Գաբալայի ՌՏԿ-ի վերաբերյալ բանակցություններ վարելու համար մոտ ժամանակներս Ադրբեջան է գործուղվելու Ռուսաստանի պաշտպանության փոխնախարար Անատոլի Անտոնովը։
«Դարյալ» տիպի Գաբալայի ՌՏԿ-ն շահագործման է հանձնվել 1985 թվականին: 2002 թվականին Ադրբեջանն այն վարձակալությամբ հանձնել է Ռուսաստանին, որը դրա դիմաց տարեկան 7 միլիոն դոլար է վճարում նրան: Գաբալայի ՌՏԿ-ի վարձակալության ժամկետը սպառվում է 2012 թվականին, և Ռուսաստանն ու Ադրբեջանը ցանկանում են այն երկարաձգել մինչև 2025 թվականը։
Ադրբեջանը պահանջում է վարձավճարն ավելի քան կրկնակի ավելացնել՝ հասցնելով 15 միլիոն դոլարի, սակայն Ռուսաստանը չի համաձայնում դրան, քանի որ ցանկանում է 1/3-ով կրճատել վարձակալվող տարածքը (210 հեկտարից նվազեցնելով մինչև 140-ի)՝ կայանը լիովին արդիականացնելու համար։
Գաբալայի ՌՏԿ-ի հեռահարությունը կազմում է 6000 կիլոմետր: Այսինքն՝ նրա տեսադաշտում են գտնվում Իրանը, Թուրքիան, Հնդկաստանը, Մերձավոր Արևելքը, ինչպես նաև Հնդկական օվկիանոսն ու Ավստրալիայի մի մասը: Կայանում աշխատում են 1400-1600 ռուս զինծառայողներ։
