Այսօր լրագրողների հետ հանդիպմանը Կոմունիստական կուսակցության առաջնորդ Ռուբեն Թովմասյանը անդրադարձավ Ռուսաստանում Պետդումայի ընտրությունների արդյունքներին: Նա մասնավորապես նշեց, որ իրենք շնորհավորել են ՌԴ Կոմունիստական կուսակցությանը ընտրություններում փայլուն արդյունք ցուցաբերելու համար: Նախորդ ընտրությունների համեմատ Կոմկուսը հավաքել էր կրկնակի ձայներ:
Թովմասյանի կարծիքով` դա պայմանավորված էր նրանով, որ Ռուսաստանի կոմունիստական կուսակցությունն ավելի արդյունավետ էր կազմակերպել իր նախընտրական քարոզարշավը` ի տարբերություն գործող «Եդինայա Ռոսիա» կուսակցության:
«Նախընտրական քարոզարշավի ընթացքում «Եդինայա Ռոսիա» կուսակցությունը իրեն համարում էր հաղթած, բայց փաստը ցույց տվեց այլ բան. անցած ընտրությունների համեմատ այս կուսակցությունը 15 տոկոսով պակաս ձայներ էր հավաքել»,- նշեց Կոմկուսի առաջնորդը:
Հարցին` արդյոք իրենք կկրկնե՞ն այն, ինչ տեղի ունեցավ Ռուսաստանում, Թովմասյանը պատասխանեց. ընտրություններին մասնակցելու և թույլտվություն ստանալու համար 8 միլիոն գրավ է հարկավոր, ինչը բավականին շատ է:
«Չնայած դրան` մենք ընտրություններին մասնակցելու համար փորձելու ենք գտնել միջոցներ, իսկ կգնանք Ռուսաստանի ճանապարհով, թե ոչ` կորոշի ժողովուրդը»:
Անդրադառնալով այլ կուսակցությունների հետ հնարավոր համագործակցությանը` Թովմասյանը բացառեց միավորումը այն կուսակցությունների հետ, որոնք ունեն կապիտալիստական հայացքներ: Իսկ իր սոցիալիստական հայացքներից նա չի հրաժարվի միայն այն պատճառով, որ երկրում լինեն արդար և թափանցիկ ընտրություններ:
Նախագահը միշտ խոստացել է, որ լինելու են արդար ընտրություններ, բայց մինչ օրս նման բան չի եղել, ընտրակեղծքիներ, այնուամենայնիվ, լինելու են, և ավելացրեց` եթե երկրում արդար ընտրություններ լինեն, ձայների առնվազն 15-20 տոկոսը Կոմունիստական կուսակցությունը կստանա: