Սիրիայի նախագահ Բաշար Ալ-Ասադը կա՛մ ամբողջությամբ կտրվել է իրականությունից, կա՛մ խելագարվել է: Այսպիսի կարծիք է հայտնել ԱՄՆ Պետդեպարտամենտի պաշտոնական ներկայացուցչի տեղակալ Մարկ Թոները:
Ավելի վաղ ABC հեռուստաալիքին տված հարցազրույցում Սիրիայի նախագահ Բաշար Ալ-Ասադը հայտարարել էր, որ երկրում ավելի քան 9 ամիս շարունակվող բախումներում զոհվում են հիմնականում իր կողմնակիցները, զինվորականները և ոստիկանները: Սիրիայի նախագահը նաև ասել էր, որ ուժայիններին ցուցարարների վրա կրակելու հրաման ինքը չի տվել: «Մենք չենք սպանում մեր մարդկանց: Աշխարհում ոչ մի կառավարություն չի սպանում իր մարդկանց, եթե իհարկե նրա գլուխ խելագար չէ կանգնած»,- հայտարարել էր Ասադը:
Ինչպես հաղորդում է Agence France-Press-ը, երեկ տեղի ունեցած ճեպազրույցին լրագրողներից մեկը խնդրել է Թոներին մեկնաբանել Սիրիայի նախագահի այս արտահայտությունը, որին Թոները պատասխանել է. «Դատելով հարցազրույցի փուլերից՝ ես կարծում եմ, նա թողնում է այնպիսի մարդու տպավորություն, որն ամբողջությամբ կտրված է իրականությունից, այն ամենից, ինչ կատարվում է իր երկրում, սիրիացի ժողովրդի նկատմամբ դաժան հաշվեհարդարներից: Դա նշանակում է կամ իրականությունից կտրվածություն կամ խելագարություն: Ես չգիտեմ»,- ասել է նա:
ABC հեռուստաընկերությանը տված Սիրիայի նախագահ Բաշար Ալ-Ասադի բացառիկ հարցազրույցն ամբողջությամբ կցուցադրվի այսօր:
